USD 446.33
EUR 485.56
RUB 5.04
Жамбыл облысында дүлей дауыл тұрып 41 адам зардап шекті. Тұман түсіп, көктайғақтан бірнеше бағытта жол жабылды. Мектеп пен колледждерде сабақ тоқтатылды. Электр және газ желілері зақымданып, жарық сөнді.
Руслан Бақытбекұлы, тілші:
- Табиғаттың тосын мінезі әп-сәтте қаланың астаң-кестеңін шығарды. Көріп тұрғандарыңыз бүгінгі болған жағдайдың бір көрінісі ғана. Синоптиктер әсіресе Тараз қаласы мен Талас ауданында желдің ерекше қатты тұрғанын айтып отыр. Секундына 30 метрге дейін ұйтқыған боран көп қабатты үйлер мен ондаған нысанның шатырын ұшырып әкетті. Арасында әлеуметтік және медициналық нысандар бар. Электр желілері үзіліп, бағандар құлады. Салдарынан жүздеген нысан жарықсыз қалды. Облыстық азаматтық қорғаныс басқармасының мәліметінше, 41 адам зардап шегіп, 5 адам ауруханаға жеткізілген. Ағаштар құлап автокөліктерді басып қалған. Қауіпсіздік мақсатында 7 аудандағы мектеп пен колледждерде сабақ тоқтатылды. Түстен кейінгі ауысым онлайн форматқа ауыстырылды.
Талғат Жамалов, облыстық білім басқармасы басшысының орынбасары:
- Әр білім беру ұйымының басшысы жеке бұйрықпен шешім қабылдап ауа райының қолайсыздығына байланысты оқу процесін ыңғайластырып қашықтан оқытуға көшіруге құқығы бар. Сарысу, Талас, Тараз қаласында, Байзақ ауданындағы мектептердің біразы түстен кейін қашықтан оқыту жүйесіне көшіп жатыр.
Желдің екпіні қатты болғаны соншалық адамды ұшырып, көліктерді аударып тастады. Халықаралық Алматы-Ташкент-Термез және облыстық маңыздағы Күйік-Қарабастау-Қаратау-Жаңатас, Жаңатас-Саудакент бағытындағы жолдар жабылды. Жолда қалған 40 адам құтқарылды. Оның екеуі бала. Олар уақытша жылыту пункттеріне жеткізілді.
Руслан Шариев, облыстық азаматтық қорғаныс басқармасының бастығы:
- Именно республкикалық маңызы бар жолдардың жабылуына байланысты көптеген автобустар жүргізушілердің тоқтауына байланысты оларды қазіргі таңда Түркістан, Шымкент, Қызылорда облыстарына жеткізу бойынша қарасты оларды сол орыннан біздің вокзалға дейін жеткізіп әрі қарай темір жол арқылы жеткізу жүргізіледі.
Дүлей бораннан құлаған ағаштар газ құбырларын да зақымдаған. Апаттың алдын алу үшін күннің суықтығына қарамастан кейбір жерде газ беру тоқтатылды. Тараз қаласында осындай 25 дерек, Жамбыл ауданында 16 дерек тіркелген. Жуалы мен Байзақ ауданында да көгілдір отын өшті. Мамандар қазір апат орын алған жерді қалыпқа келтіру жұмыстарын жүргізу мүмкін еместігін айтып отыр.
Руслан Бақытбекұлы, тілші:
- Қазір келген шығын көлемін ешкім дөп басып айта алмай отыр. Ол туралы ресми ақпарат жоқ. Арнайы штаб құрылған. Батыс Еуропа - Батыс Қытай автодәлізі Айша бибі ауылынан Түркістан облысының шекарасына дейін жабық тұр. Синоптиктер боран ертеңге дейін жалғасатынын айтады. Жолға шыққанда сақ болыңыздар!
Руслан Бақытбекұлы, Руслан Ахатіллә
