434,58 496,10 5,74
+7 (7172) 757 485 24kz@khabar.kz

Атыраулық ревизорлар Қасым-Жомарт Тоқаевтың атына арыз жолдады

  • 95
  • UPD: 21:30, 25.12.2021
Атыраулық ревизорлар Қасым-Жомарт Тоқаевтың атына арыз жолдады

Атырау облысы бойынша Тексеру комиссиясының бір топ қызметкері өз басшылары - 39 жастағы комиссия төрағасы Равиль Төлебаевқа (суретте) қарсы ұжымдық арыз жазып, арнайы органдарға жолдады, деп хабарлайды Хабар 24 azh.kz сайтына сілтеме жасап.

1 желтоқсан күні хат ҚР президенті Қасым-Жомарт Тоқаевтың атына, ҚР бас прокуроры Ғизат Нұрдаулетовке, ҚР ҰҚК төрағасы Кәрім Мәсімовке, сыбайлас жемқорлыққа қарсы іс-қимыл агенттігінің төрағасы Марат Ахметжановқа, республикалық бюджеттің орындалуын бақылау бойынша есеп комитетінің төрағасы Наталья Годуноваға жолданды.

Тексеру комиссиясының қызметкерлері өз хатында Төлебаевтың тарапынан орын алған заңбұзушылықтар фактілерін жазып, оларды дұрыстап тексеріп, сәйкесінше шаралар алуды сұрайды. Олар бірнеше мәрте қол астындағылардан ақша жинау, бюджет қаржысын пайдасыз жұмсау, қызметкерлерге тіл тигізу, заңсыз тексерістерге мәжбүрлеу, демалыс күндері мәжбүрлі жұмысқа шақыру орын алғанын тізіп айтады.

Мысалы, биыл 12 қарашада Қаржы саласы қызметкерлерінің кәсіби мерекесі қарсаңында басшылық аппаратының 5 мүшесінің есепшоттарына сыйақы аударылған, кейін оның 10% басшылық қайта жинап алған. Сонымен қатар аса қажет болмаса да, 249 991 теңгеге кофемашина, 279 990 теңгеге электрлік кофе қайнатқыш, 92 440 теңгеге қысқа толқынды пеш пен ауа ылғалдандырғыш, 180 000 теңгеге кілем сатып алынған. Сонымен қатар, хат авторларының айтуынша, мемлекеттік сатып алу порталы арқылы қызмет көлігін жылтыратып бояуға және шудан оқшаулау үшін 672 мың теңгеге келісімшарт жасақталған – бұл да қажеттілігі жоқ шығын.

Хатқа қол қоюшылар «АЖ» редакциясына хабарласқанда өз есімдерін атамауды өтінді – дегенмен, олар хатқа қол қойған. Облыстық прокуратура қазір хаттың мазмұнын тексеруде.

Біз түсінік алу үшін Равиль Төлебаевтың өзіне хабарластық. Телефонмен сөйлескенде ол қол астындағылардың ұжымдық хаты мен прокурорлық тексеріс туралы білетінін, дегенмен, тексеріс аяқталғанға дейін ешқандай түсінік бермейтінін айтты.

Еске салайық, Р.Төлебаев Атырау облысы бойынша Тексеру комиссиясының төрағасы болып биыл 29 қыркүйекте сайланды. Оған дейін Жамбыл облыстық сыбайлас жемқорлыққа қарсы іс-қимыл департаменті басшысының бірінші орынбасары қызметін атқарған. «Ерен еңбегі үшін» медалімен, «Қазақстан Конституциясына 25 жыл» естелік медалімен марапатталған.

Хабар 24 телеарнасы