456,05 484,00 8,64
+7 (7172) 757 485 24kz@khabar.kz

Алматы-Бішкек күре жолындағы өткел құрылысы ұзаққа созылып кетті

  • 159
  • UPD: 19:55, 08.04.2022
Алматы-Бішкек күре жолындағы өткел құрылысы ұзаққа созылып кетті

Алматы-Бішкек күре жолының 19-шақырымындағы өткелдің құрылысы тоқтап тұр. Салдарынан сол маңда ұзынсонар көлік кептелісі болады. Адамдар екі ауылды бөліп тұрған республикалық жолды кесіп өтеді. Бұл көлік қозғалысын тежейді. Көпір құрылысы неліктен созылып кетті?

Алматыдан шыққандағы 4 жолақты жол Кемертоған мен Райымбек ауылына келгенде тарылып, көлік кептелісі еселене түседі. Таңертеңмен қалаға кірерде, кешкісін шығарда осы жерден тез өтіп кету кез келген жүргізушінің арманы десек болады. Қазір көлік ағынына жаяу жүргіншілер жолағы кедергі келтіреді. Ал кептеліс болмаған күннің өзінде бұл жер адам үшін қауіпті. Өйткені ертелі-кеш жүйткіген көліктердің тоқтауы да қиын.

БЛИЦ: 

- Біреуі тоқтаса, біреуі тоқтамайды мына жерден, авария да болып жатыр, қағып кетіп жатыр.

- Өткел болғаны дұрыс қой жолдан өткенге. Мынадай қауіпті жағдай, машиналар көп, өткенде пробка болып қалады.

- Пробка, арғы жақта еще хуже болып жатыр. 

- Мынау уже екі жыл болды тұрғанына. Қаскелеңнен басталады пробка, қай жаққа қарап отыр түсінбеймін.

Жолаушыларға арналған жерүсті өткелі мен автокөліктерге қажетті эстакаданың құрылысы 2020 жылы басталған. Оған мемлекеттік бюджеттен 2 миллиард теңге бөлінген. Бірақ көп ұзамай құрылыс тоқтап қалады.

Нұрқат Ақылтаев, "Қазавтожол" ҰҚ" АҚ Алматы облыстық филиалы директорының орынбасары:

- Алдыңғы мердігер компания жоспар бойынша негізі осы 2022 жылдың ішінде бітіру керек болған. Бірақ сол 2021 жылдың өзінде олар жұмыс қарқыны дұрыс жүрмегендіктен біз келісім-шартты үзуге тиісті болдық. Енді көптеген өзінің себептері бар. Өздеріңіз білесіздер осы таңда пандемия бар, соған байланысты көптеген құрылыс материалдарының бағасы қымбаттап кетті.

Мамандардың айтуынша, қазір жоба құны қайта қаралып жатқан көрінеді. Яғни «Дәулет дорстрой» мердігер компаниясы бітіре алмаған құрылыс жұмыстарын енді қандай компанияның жалғастыратыны әзірге белгісіз. Осылайша жол азабын тартып жүрген жұрттың талап-тілегі биыл орындалмайтын секілді.

Жандос Айтбайұлы, Радик Жақыпов

Хабар 24 телеарнасы