Оқуы мен жұмысынан айырылмау үшін ауруын жасырып жүр

Бейресми статистика бойынша елде 2 мыңнан астам адам "шашыраңқы склероз" дертіне шалдыққан. Оқуы мен жұмысынан айырылмау үшін ауруын жасырып жүргені қаншама?! Алайда жас талғамайтын бұл сырқатты сырт көзден таса ұстау мүмкін емес. Уақытылы алдын алмаса денсаулыққа зиян. Алғашында симптомдары көп білінбейді. Бірақ асқынған кезде науқас тепе-теңдігін жоғалтып, қол-аяғын басқара алмай қалады. Ұмытшақтығы байқалып, үнемі шаршаңқы күйде жүреді. Бүгін осы кеселге қарсы Дүниежүзілік күрес күні.

Павелдің жүрісіне қарап, ішімдікке сылқия тойып алған деп ойлауыңыз мүмкін. Тәртіп сақшылары да талай мәрте тоқтатқан. Бірақ бұл кейіпкеріміз "шашыраңқы склероз" дертіне душар болған жан. Театр сахнасында жүргенінде бірқатар көрермен оны мас деп санап, актердің үстінен арызданыпты. Павел бойындағы ауруының асқынғанын сол кезде түсінген. Қазір ол театрда қойылымдарды пианиномен сүйемелдеп ғана нәпақасын тауып жүр. Екінші топтағы мүгедектігі бар.

Павел Шестопалов, қала тұрғыны:

- Мені көріп, "сахнаға мас актер шықты" деген көрермен көп болды. Осыдан кейін өнерден алшақтауыма тура келді. 2005 жылы ангинамен ауырдым. Кейін әрнәрсе көзіме қос көріне бастады. Көз дәрігеріне бардым. Ол мені невропатолог маманға жіберді. Шашыраңқы склероздың белгісі бар, емдел деді. Бірақ мен дертіме қатты мән бермей 5 жыл жүріп алдым. 2010 жылы ресми диагноз қойылып, мүмкіндігі шектеулі жандардың қатарына қосты. Сылбыр жүрісіммен бірге енді аздап тұтығатыным пайда болды.

Ал Вячеслав осыдан бірнеше жыл бұрын зауыттардың бірінде дәнекерлеуші болып қызмет еткен. Көзі қарауытып, басы айнала берген соң МРТ-ға түседі. Оған да жоғарыда аталған диагноз қойылады. Жылдар өте өздігінен жүре алмай қалды. 

Вячеслав Литвинов, қала тұрғыны:

- 2012 жылы денсаулығым сыр бере бастады. Көзімді жұмған сайын басымның айнала беретінін байқадым. Аяқ басуым қиындай түсті. Осылай бір ай жалғасты. Әу баста жұмыстағы жүктемеден кейін шығар деп ойлағам. Кейін білікті дәрігерлердің бірі нақты диагнозымды қойып берді. Жарты жыл еңбек демалысына шығып, екінші топ мүгедектігін алдым.

Шашыраңқы склероз - бұл өз иммундық жасушаларың жүйке талшықтарының қабықшасына шабуыл жасайтын жүйке жүйесінің созылмалы ауруы. Невропатолог маман Бағыжан Сыздықова осылай дейді.

Бағыжан Сыздықова, невропатолог-маман:

- Халық арасында "склерозды" ақыл-ойдың кемістігі деп түсінеді. Бірақ бұл ауру науқасты бірінші кезекте физикалық жағынан шектейді. Қол мен аяқ, саусақ буындары ұйып қала береді. Бет бұлшық еті бір жағына тартылып, көз қылиланып қалуы мүмкін. Өкініштісі сол, аталған дерт созылмалы болған соң онымен күрес өмір соңына дейін жалғасады. Қымбат дәрілерді қабылдап ғана басып отыруға болады. Елордада жылына 10-15 науқас анықталып отырады.

Дер кезінде дәрігер жазып берген дәрілерді ішпесе, адам арбаға таңылады. Бірақ Қазақстанда науқастарға жағдай жасалған. Қымбат дәрі-дәрмекке ақша тұрақты түрде бөлініп жатыр. Елордадағы қоғамдық бірлестік төрағасы Сапура Байғуанованың мемлекетке алғысы шексіз.

Сапура Байғуанова, шашыраңқы склерозға шалдыққандар қоғамдық бірлестігінің төрағасы:

- Дәл қазір біздің науқастарға Мавенклад препараты қажет. Денсаулық сақтау министрлігінің бізге беріп жатқан көмегі зор. Бұған дейін талай мәрте қымбат дәрі-дәрмекті тегін алып берді. Алайда жоғарыда аталған дәрі де қымбат. Сондықтан тегін әрі тез алдырмасақ, Мавенкладтың науқастарға тиер пайдасы аз болады. Өйткені біздің ауру бір орында тұрмайды. Сонымен қатар клиникалық хаттамалардың да жаңартылғанын қалаймыз.

Сапура Байғуанова бұл өтінішін қағазға түсіріп, министр атына хат жолдады. Айта кеткен жөн, елордадағы қоғамдық бірлестікке 150-ге жуық науқас тіркелген. Алайда оның тек тең жартысы орталыққа ұдайы келіп отырады. Бөлме тар және жертөледе орналасқан соң келушілерді бір сәтте қабылдау мүмкін емес. Осыған байланысты әкімдік тарапынан кең кеңсе ұсынылса игі болар еді, дейді Сапура Байғуанова. 

Мирлан Алтынбек, Ержан Қанапия, Аят Дүйсебаев