loader

Елде 675,7 мың тонна картоп жинады

Елде 675,7 мың тонна картоп жинады

Биыл отандық дихандар 675 мың тоннадан астам картоп жинады. Өнімділік орташа есеппен гектарына 203 центнерден шығып жатыр, деп хабарлайды «Хабар 24».

Былтыр гектарына 166 центнерден келген. Биыл диқандар сапалы тұқым қолданып, тыңайтқышты уақытылы септі. Арам шөп пен аурулар, зиянкестерге қарсы химиялық өңдеуді де дер кезінде жүргізген. Ауылшаруашылығы министрлігінің мәліметіне қарағанда, Қазақстан ішкі нарықты картоппен толық қамтитындай өнім жинайды. Алайда оны жыл бой сақтайтын қойма жоқ. Сондықтан маусымдық тапшылық кезінде сырт елден иморттауға тура келеді

Азат Сұлтанов, ҚР АШМ егіншілік департаментінің директоры:

– Биыл картоптың бағасы диқандар үшін қолайлы болды. Сондықтан көбі экспорттамай ішкі нарыққа сатты. Оның үстіне қажет кезде жауапты министрлік ретінде экспортқа шектеу енгіздік. Былтыр Сарыағашта ерте аяз түсіп, қазан ұрып кеткен болатын. Биыл ауа райы да қолайлы болды. Қазір мемлекет қолдауымен картоп сақтайтын қоймаларды көптеп салу жұмыстары жүргізіліп жатыр. Осы жұмыс нәтижелі аяқталса, біз ішкі нарықтан артылғанын ғана экспорттаймыз.

Ел өңірлерінде картоп қанша тұратынын салыстырып көрейік. Бұл статистикалық мәлімет емес. Бағаны әр өңірдегі әріптестерімізден сұрадық. Сонымен картоп ең арзан өңір Павлодарда келісі 130 теңге шамасында. Қарағандыда 145-тен. Елорда дүкендерінде 160 теңгеден. Ал Алматыда 20 теңгеге қымбат. Орал мен Түркістан жұрты бір келі картопты 200 теңгеден алады. Шымкентте 230-дан. Ел бойынша ең қымбаты Семей мен Петропавл екен. Мұнда бір келі картоп 250 теңге екен.

Сондай-ақ...