Қарқаралыдағы аламанда атынан айырылған шабандоз бала мәреге жаяу жүгіріп жетті

Бәйге Татан ауылындағы мешіттің ашылуына орай өткен екен, деп хабарлайды «Хабар 24».

30 шақырымға созылған жарысқа 25 ат қатысқан. Ә, дегеннен қара үзіп, 6 айналым бойы аламанның алдын бермеген «Бақторы» есімді сәйгүлік мәреге бір шақырым қалғанда құлап, жүрегі жарылып кеткен. Осы кезде алматылық кішкентай шабандоз Арнат Мұратхан аттың жүгенін сыпырып алып, мәре сызығын жаяу кесіп өтті. Бірақ соңында келе жатқан сәйгүлік жаяу баладан озып,  намысшыл ұлға екінші орын бұйырды. Дегенмен төрешілер баланың бағын байламай , бір миллион теңге жүлдені қанжығасына байлап берді. Мәрт азаматтар жүлдеден бөлек анасы екеуіне шетелде демалуға жолдама да сыйлады.