Алматыда Қазақстандағы тұңғыш жаңғақ бағы жайқалып өсіп тұр

Жаңғақты да жерсіндірдік. Алматы облысында қазақ топырағында көп кезедесе қоймайтын жеміс ағашын өсіріп отырған шаруа бар, деп хабарлайды «Хабар 24».

Мәншүк Жексембекова – жай шаруа ғана емес, биология ғылымдарының докторы. Ұзақ жылдар бойы биотехнология саласында зерттеу жүргізген. Сөйтіп зерттеуін іс жүзінде көрем деп бір кездері Алматы облысының Түрген ауылына табан тірейді. Әкесі де бағбан болған екен. Енді осы бір кәсіпті ғылыммен ұштастырып, табыстың көзін тапқан.

Диқандардың еңбегі Мәншүк Жексембековаға бала кезінен таныс. Оның әкесі де – жер емген шаруа. Ауылға келіп, жеке шаруашылығын жолға қойған Мәншүк қазір алты бағытта кәсібін дөңгелетіп отыр. Соның бірі – 81 гектар жерді алып жатқан бақ. Мұнда грек жаңғағы, бадам және фундук егілген. Жаңғақтың соңғы түрін 2017 жылдан бастап өндірістік ауқымда өсіріп келеді. Қазақстанда бұған дейін жаңғақ бағы болмаған.

Мәншүк Жексембекова, шаруа қожалығының басшысы:

- Біздің өңірде агротуризмді дамытуға мүмкіндік көп. Себебі шаруа қожалықтары алуан түрлі өнім өсіреді. Жеміс-жидектер, жүзім, алма, жаңғақ бақтары туристер үшін қызық. Олардың неше түрлі сұрыптары бар. Біздің фермерлердің көпшілігі жақсы өнім алудың ерекше технологияларын біледі. Олар өздерінің тәжірибелерімен бөлісуге дайын.  

Фундуктың ішкі нарықтағы бағасы келісіне 5 мың теңге,- дейді шаруа. Сондықтан өндірістік ауқымда өсіру импортты алмастыру мәселесін шешеді және бағаны айтарлықтай төмендетеді. Қыркүйек айында фермер алғашқы агротур ұйымдастырыпты. Туристер жаңғақ жинауды тамашалап, дәмін татқан. Бұл жолы қонақтар шаруашылыққа көмектесіп, бақтың айналасына терек көшеттерін отырғызды. Терек тез өседі. Болашақта орман жаңғағын үсік пен желден қорғайды.

Ринат Фазылбеков, Қазақ өсімдіктерді қорғау және карантин ҒЗИ бөлім басшысы:

- Терек орманның алғы шебінде тұрады десек болады. Теректен кейін басқа ағаштар жақсы өседі. Бүкіл әлемде осы тәжірибені қолданады. Бұл Қазақстан үшін де қолайлы.

Келушілер ұзын-саны 200-ге жуық терек екті. Мамандардың айтуынша, жас қалемшелер небәрі 3 жылда жайқалып шыға келеді. Осылайша фундук ағаштарының мол өнім беруіне де септігін тигізеді.

Авторлары: Гүлжан Көленқызы, Қарлығаш Менаяқова, Сержан Жұмабаев