Мектеп оқушылары қар күреп жүрген жұмысшыларға, ыстық бауырсақ пен шәй және түрлі тәттілер таратуда, деп хабарлайды «Хабар 24».
Игілікті істі бірнеше күн бұрын шаһардағы №56 мектептің волонтерлері бастаған. Іле-шала қалған білім ошақтары жалғастырып жатыр. Оқушылар қолдан келгенше қар күреп, қолғабыс етуде.
Айта кетерлігі, 1 апта бұрын Таразда қалың қар жауып, аяз күшейген еді. Мұндай сәтте коммуналдық қызметшілердің жұмысы еселенетіні белгілі. Тек Тараз көшелеріне күнделікті 300-ге жуық тазалық сақшысы жұмысқа шығады. Олар күннің суықтығына қарамастан қоғамдық орындарды тазалап, автобус аялдамаларындағы мұзды ояды. Олардың бұл еңбегі қандай құрметке болса да лайық, - дейді оқушылар.
Арайлым Орынбасар, оқушы:
- Мұндай сауапты істі біз Қазақстандағы барлық елдерге жолдағымыз келеді. Себебі бұл – игі іс, сонымен қатар сауапты іс. Үлкен кісілерге көмек көрсеткен ол дұрыс нәрсе деп ойлаймын.
Гүлзипа Көпбаева, "Жасыл-Ел Тараз" жұмысшысы:
- Балалардың көмектесіп келгеніне қуанып қалдық. Апасындай, немереміз болып, соған қуанып отырмыз. Балаларымыздың ниеті жақсы екен. Болашағы зор болсын.