Таразда жаңа туған сәбиді саудалаған 2 медицина қызметкері ұсталды, деп хабарлайды «Хабар 24».
Прокуратураның мәліметінше, 35 жастағы келіншек 4 қаңтарда босанған. Одан соң аурухана қызметкерлеріне материалдық жағдайының төмендігіне байланысты нәрестені балалар үйіне беретінін айтқан. Жағдайды оңтайлы пайдаланған 2 акушер балалы бола алмай жүрген 39 жастағы әйелді алдын ала тапқан. Оған сәбиді 1,5 млн теңгеге сатып жіберген. Алдын ала дерекке сүйенсек, шақалақ 1 апта бойы жалдамалы пәтерде сатып алушымен тұрған. Құжаттарды реттеу барысында адам саудалағандар ұсталды. Енді медицина қызметкерлері 9 жылдан 12 жылға дейін сотталуы мүмкін.
Жамбыл Сматов, Тараз қаласының прокуроры:
- Кәмелетке толмағанды сату дерегі бойынша Қылмыстық Кодекстің 135-бабымен сотқа дейінгі тергеп тексеру тіркеліп, 2 медицина қызметкері уақытша ұстау абақтысына қамаққа алынды. Қазіргі таңда нәресте балалар үйіне орналастырылған, жағдайы тұрақты. Қылмыстық істің тергелуі прокуратураның бақылауында. Сатқан да, сатып алған да және ортасында болған делдалдар – барлығы жауапқа тартылады.