Иен далада немесе қақаған аязда далада адасып кетсең не істеу керек? Шығыс Қазақстандық құтқарушылар мектеп оқушыларына арнап осындай шеберлік сағатын өткізді, деп хабарлайды «Хабар 24».
Бұл үшін олар бір топ жоғарғы сынып оқушысын шаңғымен серуенге алып шықты. Осылайша, қалың қарда, таулы орман ішінде қалып қойған кезде не істеу қажеттігін іс жүзінде көрсетті. Жеткіншектер, ең бірінші, омбы қар мен аяздан зардап шеккендерге жәрдем берсе, жартысы көмек шақыратын белгі ретінде жылдам алау жағуды үйренді. Сонымен қатар балалар ну орманның ішінен компассыз қалай жол табуға болатынын да білді. Нағыз мамандардан тәжірибе алды. Мұндай шара аптасына бірнеше рет өткізіліп жатыр.
Жадыра Аманғалиқызы, ШҚО ТЖД бас маманы:
- Қазіргі өсіп келе жатқан ұрпаққа қыс кезіндегі төтенше жағдайдан қалай сақтану керек, егер де осындай жағдайға тап болсаң, қалай аман қалу керек, қыс кезінде қолда бар заттармен қалай баспана жасау керек деген сияқты немесе қалай жол тауып, бағыт-бағдар жасап үйрену керек сияқты тәсілдерді үйрету бойынша осындай жарыстар өткізіліп жатыр.