Атырау облысы бойынша 40 ауылды жаңғырту жобасы қабылданды
«Ауыл – ел бесігі» бағдарламасы аясында Атырау облысы бойынша 40 ауылды жаңғырту жобасы қабылданды, деп хабарлайды «Хабар 24».
Мұнайлы өңірде 153 ауыл бар. Бағдарламаға 15 ауыл мен 2 кент еніп отыр. Ол үшін республикалық бюджеттен 5,8 млрд теңге бөлініп, 22 жобаны іске асыру жоспарланып отыр. Соның ішінде Мақат кенті де бар. Былтыр ауданға 2 млрд 36 млн теңге қарастырылған еді. 6 жоба қолға алынып, 4-уінің құрылысы аяқталды. Солардың бірі – аудан орталығындағы жаңа стадион мен балалар спорт мектебі. Сондай-ақ Доссор кентінде 21 шақырымдық жол салынып, пайдалануға берілді. Ал стадион құрылысы маусым айында аяқталады.
Азамат Шаңғалаев, Мақат ауданы әкімінің орынбасары:
- Бұл – 2 жылдық жоба. Бұл жоба бойынша спорт залдың ішінде күрес залы, бокс залы бар. Сыртқы стадионда үлкен футбол алаңы, волейбол, баскетбол алаңдары қамтылады. 2023 жылға «Ауыл – ел бесігі» бағдарламасы бойынша Доссор кентінен 288 млн теңгеге 4 ойын алаңының құрылысы басталады.