Ақтауда көмекке зәру әйелдерді қолдау орталығы ашылды.
Әлеуметтік нысанда қиын жағдайға тап болған қыз-келіншектер мен жұмыссыз жүрген аналар кәсіп меңгеріп жатыр. Кейін олардың жұмысқа тұруына не бизнес ашуына көмек беріледі. Орталықтың құрылуына көпбалалы қала тұрғыны атсалысқан. Қайырымды әйел мемлекеттен грант ұтып, қаржыны екі қолға бір күрек іздегендерді оқытуға қажет жабдықтарды алуға жұмсапты.
Әлеуметтік нысан бірнеше оқу залынан тұрады. Мұнда тоқыма, бет әрлеу және емдік массаж сабағы өтеді. Әйелдердің алаңсыз жұмыс істеуі үшін балаларға арналған ойын бөлмесі де бар. Тігін өнерін таңдаған аналар ұлттық нақыштағы кәдесый, құрақ көрпе тігуді үйреніп жатыр. Тәжірибелі ісмер Қалбике Күншығырова өз білгенін өзгелермен бөлісуде. Атамекен ауылынан қатынап, осында қызмет атқарады. Айына 100 мың теңге жалақы алады.
Қалбике Күншығырова, ауыл тұрғыны:
- Жұмыс сұрап келдім. Сол кезде Динара апа қолыңыздан тігу келеді ме деді. Ия, келеді. Үйде тігіп жүрген заттарым бар дедім. Сөйтіп, осы жерге жұмыс алды. Үйде отырған көпбалалы аналар бар. Ерекше балалары бар аналар бар. Соларға үлкен мүмкіндік. Ертең өз жұмыстарын жалғап кетуге де мүмкіндігі бар.
Орталықта 10 әйел бар. Дені - Ақтауға жақын елдімекен тұрғындары. Жоба үйлестірушісі Динара Көктаубайқызы бұған дейін жарты млн теңге грант ұтып, 3 тігін машинасын сатып алған. Бастапқыда бірнеше көпбалалы анамен бірігіп, іс бастайды. Кейін қоғамдық қор құрып, әкімдіктен берілген ғимаратты әлеуметтік кешенге айналдырады. «Кәсіп меңгерген қыз-келіншектерді жұмысқа алуға жеке кәсіпорындардан сұраныс жиі түседі», - дейді.
Динара Көктаубайқызы, жоба үйлестірушісі:
- Көмектесемін деген адамдар көп. Мысалы, тігінді үйретсеңіз бізде адамның жетіспеушілігіне байланысты жұмысқа аламыз деп жатыр. Визажист қыздарды біздегі модельдеріміз модаға шыққан кезде бояуға керек деп сондай үлкен ұсыныстар келіп жатыр. Осы уақытқа дейін мыңдаған анаға көмек бердік десек өтірік айтпағаным.
Үкіметтік емес ұйымның қолдауымен екі жылда 50 әйел тігіншілік курсын аяқтап шықты. Тағы 5 көпбалалы ана бизнес жоба түзіп, мемлекеттен қайтарымсыз грант ұтқан. Бұл жерге жеке бас құжатын рәсімдеп, әлеуметтік мәртебе алуға ниетті тұрғындар да хабарласа алады. Оларға заңгерлік және құқықтық көмек тегін көрсетіледі.
Авторлары: Талғат Исламұлы, Ренат Досалиев
