Жетісу облысында Б. Момышұлымен қатар майданға кірген ардагер тұрады

Жетісу облысында Бауыржан Момышұлымен қатар майданға кірген Сәрсенбай Қаңтарбай есімді ардагер тұрады.

Қарт майдангер екінші дүниежүзілік соғыста даңқты полковник басқарған 9-шы гвардиялық дивизия сапында болған. Әрі сол кездің аса құпия қаруын күзетіп, оны жау қолына бермеу міндетін атқарды.

Сәрсенбай ақсақал қазір кенже немересінің күтімінде. Қарт майдангерді мерекелік шараларға апарып, алып келетін  де Нұралы. Жиырмаға қадам басқан жас жігіт атасын үлгі тұтар асқар тауым,- деп біледі.

Нұралы Сәрсенбай, соғыс ардагерінің немересі:

- Атам тарихта қалатын тұлға деп есепеймін. Аштықты да көрді. соғысты да көрді. Қандай қиындық болса да мойымай төтеп беріп, қалай өмір сүру керек екенін қиындыққа қалай шыдай керек екенін іспен дәлелдеп келе жатыр. Және де өмірден көрген түйгенін бізге айтып отырады. Мен атаммен мақтанам.

Сәрсенбай қария 1942 жылы әскерге шақыртылып Аягөзде жасақталған тұңғыш қазақ полкінің құрамына алынған. Автоматшыларды дайындайтын алты айлық оқу-жаттығудан соң соғыстың нағыз қайнаған ортасына түседі.

Бір жылдан соң саны сиреген сарбаздар Бауыржан Момышұлы басқарған 9-гвардиялық дивизияға қосылыпты. Оларға сол кездің ең қауіпті әрі құпия қаруын күзету міндеті жүктелген. 

Сәрсенбай Қаңтарбай, соғыс ардагері:

- Присяга бергенбіз. Ол «Катюша» айтылмайды. Құпия бөлім ғой. №49 катюшаны күзеттік, бір жерде 15 минут тұрады. Одан артық тұрмайды. Күндіз тоғайдың ішіне кетіп қалады. Қай жерде немістің қауырт жиналғаны бар соны атады. Бауыржан Момышұлы қатал адам ғой. Бұйрық береді. Сөйлейді, жігерлендіреді солдаттарды, қайтпаңдар артыңда отаның, әке-шешең, елің-жұртың ешқандай қашып пленге өтіп кету болған жоқ.

9-гвардиялық атқыштар дивизия сапында Сәрсенбай ақсақал Польша, Литва, Латвия, Эстония сынды елдерді азат етуге қатысыпты. Өмірінің үш жылын майдан даласында өткізген ол Германияға дейін жетеді. Сол мемлекет аумағындағы шайқас кезінде Бауыржан Момышұлымен қатар жараланған.

Сәрсенбай Қаңтарбай, соғыс ардагері:

- Бауыржан Момышұлы екеуіміз 21 қаңтар 1945 жылы жараландық. Ол кісі белінен жараланды. Біз 12 автоматшы жараландық. Ұшаққа салып Мәскеуге жіберді, Владимир облысы Калчюгин қаласында 6 ай жатып емделдік. Бір айдан соң жеңіс келді. Сол жерде Мәскеуге барып парадқа барып көрдік бәрін. Соғыстан кейін де бірге болып дәмдес тұздас болып тұрдық. Былайша жақын жүргенде бауырмашыл адам болған.

Қарт майдангер елге келген соң мұғалім және пошташы болып еңбек еткен. Содан болар әлі күнге дейін баспасөзді шолып, радионы тыңдап, телеарнадан жаңалықтарды көруге тырысады. Жүзге жуық немере шөбере сүйіп, ғасырлық ғұмыр кешкен қария елдегі бейбітшіліктің бұзылмауын үнемі ақ батасына арқау етіп келеді. 

Авторлары. Шыңғыс Қалиден, Жеңіс Әбдірешов

Сондай-ақ...