Екінші дүниежүзілік соғыс кезінде Доссорда өндірілген қара алтын тікелей майданға өңдеусіз жіберіліп отырған. Сапасы өте жоғары мұнай танктердің қозғалысын қамтамасыз етті. Бүгінгі шығарылымды біз осы «Доссормұнайгаз» өндірістік басқармасы мен оған қарасты Шығыс Мақат кен орнының жұмысына арнамақпыз. Мұндағы қара алтында күкірт аз және оның технологиялық құрамы жоғары. Мұнай сапасын зертханашылар үнемі тексеріп отырады. Өнім беру жөнінен көш бастап тұрған өндірісте 91 ұңғыма жұмыс істейді. Мұнайды дайындау және тасымалдау цехының қуаттылығы айтарлықтай күшті. Бүгінде мұнаймен бірге келетін ілеспе газды өндіру арқылы цех көгілдір отынмен бүкіл өндірісті және жақын маңдағы елді мекендерді қамтамасыз етіп отыр. Кен орнында көзге үйренген тербелмелі сорап емес, мұнай өндірудің жаңа технологиялары бұрандалы сораптар жұмыс істейді.