Бұның алдында бірінші сұрыптағы бидай ұны сегіз жарым мың теңгеден сатылса, қазір 14 мың теңге. Осыған байланысты сауда сөрелері мен базардағы нан бағасы құбылып шыға келді. Әзірге әлеуметтік маңызы бар тауар түріне кіретін қалыпты бөлкенің бағасы өзгеріссіз. Себебі жергілікті билік тұрақтандыру қоры арқылы сауда желілері мен 30-ға жуық наубайхана иесімен келісімшарт жасасқан. Олар тәулігіне 140 мың бөлке нан пісіріп, қала тұрғындарының сұранысын өтеп отыр. Ал ұн мен қанттың қымбаттауына Ресейдің демпингтік саясат ұстанып, экспортқа шектеу қоюы себеп болғанын айтады. Қайрат Базарбеков, қалалық ауыл шаруашылығы және ветеринария басқармасы басшысының орынбасары: - Ресей нарқынан демпингтің әсерінен осы тауардың бағасы біршама төмендеген. Енді қазір бұл тауарлардың нақты тоқтауына байланысты екі тауардың баға динамикасында ауытқу орын алды. Осы орайда қала әкімдігінде арнайы жұмысшы топ тиісті зерделеу жұмыстарын жүргізді. Бүгінгі таңда екі тауардың да нарықта тапшылығы жоқ және біздің тұрақтандыру қоры есебінен босатылған ұн және қант ол ескі бағада.