Ел Тәуелсіздігінің 30 жылдығына арналған дәстүрлі айдарымызды жалғастырамыз. Бүгін 2001 және 2003 жылдар аралығында болған елеулі оқиғаларды назарларыңызға ұсынбақпыз. ДАМУ БАҒЫТЫ АЙҚЫНДАЛҒАН ОН ЖЫЛДЫҚ 2001 жыл. 21-ғасырдың алғашқы баспалдағы. Қазақстан Тәуелсіздігінің 10 жылдық мерейтойы да осы датаға тұспа-тұс келді. Осы аралықта еліміз кешегі Кеңестік кезеңнің шекпенінен ажырап, өз алдына мақсат-мұраты айқын дербес мемлекетке айналды. Егемен елдікті айқындайтын елдің шекарасы берік қолға өтіп, барлық жағынан бүтінделді. Ұлттық қорғанысымыз – Қарулы Күштер құрылып, қауіпсіздік күшейтілді. Жаңа Конституция қабылданды. Қазақ елі саяси жаңғырды һәм ел экономикасына қан жүгіріп, әлеуметтің әлеуеті артты. Ең бастысы, Қазақстан дамудың өзіндік даңғыл жолын тапты. ҚАЗАҚ ЕЛІНІҢ БЕЛГІСІ – «БӘЙТЕРЕК» 2002 жыл. Евразия кіндігі, астана төрінде, шыңына алтын шарды көтерген күміс түсті жарқыраған мұнара – «Бәйтерек» монументі бой көтерді. Ол көкке ұмтылған Астананың символы еді. Нұрсұлтан Әбішұлы Назарбаевтың сызбасы негізінде тұрғызылған «Бәйтерек» халықаралық байқауда ТМД елдеріндегі ең үздік нысан деп танылды. Оның биіктігі 97 метр. Бәйтерек бүгін де ажарын жойған жоқ. Бас қаламыздағы әлемнің әр түкпірінен ағылған туристер көз тастап, қызыға қарайтын басты сәулет нысанының бірі. ДІНИ КЕЛІСІМ – БІРЛІК ПЕН ТҰРАҚТЫЛЫҚ КЕПІЛІ 2003 жыл. Астанада әлемдік және дәстүрлі діндер жетекшілерінің бірінші құрылтайы өтті. Айту кету керек, тарихта бұған дейін дәстүрлі үш бағыттағы дін басшылары бір шаңырақ астында бас қоспаған. Сондықтан бұл жиын жас та болса бас бола білген Қазақстанның ауыз толтырып айтар жетістіктерінің бірі деуге әбден болады. Расында, кез келген мемлекет үшін дінаралық келісім қоғам тұрақтылығының кепілі. Ал қоғам тыныш болса, қарыштап даму тоқтамасы анық.