Алматыда «Наркостоп» жобасының волонтерлері қалалық полицияның атсалысуымен жыл басынан бері есірткі жарнамалайтын 170 мың граффитиді бояды. Жоба жетекшісі Нұржан Жақыповтың айтуынша, бір жылға жетер-жетпес уақыт ішінде команда 40 адамнан 1200 тұрақты еріктіге дейін өскен. Бүгін олардың қатарына полиция департаментінің басшысы Арыстанғани Заппаровта қосылып, қитұрқы жарнамаларды өшірді. Президент Қасым-Жомарт Тоқаев өз Жолдауында синтетикалық есірткіні өндіру мен таратуға қарсы күрес ұлттық сипат алуы керектігін атап өткен еді. «Мұндай күресте қоғамдық бірлестіктердің рөлі маңызды»-деген генерал-майор Заппаров волонтерлерге алғысын білдірді. Ал еріктілер: «Қабырғалардағы жазуларға бей-жай қарамаңыз. Өйткені мұндай жазулардың әрқайсысы біреудің тағдыры»,-дейді.