Батыс Қазақстан облысының Жаңақала ауданына қарасты 22 елді мекеннің тең жартысы орталықтандырылған ауызсумен қамтылған, деп хабарлайды «Хабар 24». Енді 7 елді мекенді Жаңақала топтық су құбырына қосу көзделген. Көптен бері айтылып келе жатқан Кіші Айдархан ауылына да су жеткізілді. Бұл мақсатқа бюджеттен 4 млн. теңге қаржы бөлінді. Бірнеше жыл қатарынан болған қуаңшылық салдарынан аудан аумағындағы көптеген көлдер құрғап қалған еді. Биыл жауын-шашын мол түсіп, аймақтағы су қоймаларының арнасы кемеріне келді. Енді суды жеткізу үшін каналдарды тазарту жұмыстары қолға алынды. Дархан Закарин, Жаңақала ауданының әкімі: - Бұл – Сәңкібай магистралдық каналы, яғни «Қазсушар» РМК теңгеріміндегі канал. Бұл мекеме каналда жөндеу жұмыстарын жүргізіп жатыр. Осы қараша айының аяғына дейін тәмамдау қажет. Қыстай Қоғалы көліне су түсіруді жоспарлап отырмыз. Қоғалының аузына баратын құбырларының көлемінің деңгейі биіктеген болатын, соны қайтадан түсіру жұмыстарын аудандық техникалармен жасап қойдық.