Солтүстік Қазақстан облысы, Леденёво ауылының дәрігерлері жаңа фельдшерлік-акушерлік пунктте қыс бойы тоңып шықты. Олардың айтуынша емдеу мекемесі сапасыз жөнделген. Мамандар науқастарды суық кабинетте қабылдауға мәжбүр. Бұған тұрғындар да наразы. Айдарбек Айтмұхамбетұлы, тілші: - Леденёво ауылындағы фельдшерлік-акушерлік пункт өткен жылдың желтоқсан айында тапсырылған. Бірақ тұрғындардың айтуынша, жаңа ғимараттың сырты бүтін болғанмен, іші түтін болып шықты. Күрделі жөндеуден өткен фельдшерлік – акушерлік пункт қайта ашылғанда дәрігерлер мен ауылдықтардың қуанғаны рас. Бірақ қуаныш ұзаққа бармады. Ақ халаттылар қыс бойы тоңып, көңіл-күйлері су сепкендей басылды. Сәуле Шамғанова, фельдшерлік-акушерлік пунктінің санитары: - Суық болды. Суық болды. Енді қалай далада, печканы сөндірсе суып қалады. Мына батарея көрмейсіз ба қандай. Істегеннен кейін конечно бәрін істеп берсе ғой как положено. Дәрігерлер науқастарды суық кабинетте қабылдауға мәжбүр. Ал олардың арасында жаңа туған сәбилер мен жүкті әйелдер бар. Жергілікті тұрғындардың айтуынша, жөндеу жұмыстары сапасыз атқарылға Күләш Мәженова, ауыл тұрғыны: - Құрылысшылар көзге көрінбеді деуге болады. Жөндеу жұмыстарына тартылған адамдар жиі ауысты. Тұрақты түрде ешкім істеген жоқ. Бұл ФАП – ты қанша күткен едік. Енді қынжылып отырмыз. Қынжылатын жөні бар. «Ғимараттың қабырғалары бос. Сондықтан іші жылынбайды», - дейді тұрғындар. Оны пеш жағушы да растап отр Алексей Ганчарик, пеш жағушы: - Қатты аяздар болғанда іштегі температура 10 градустан да аспады. Пеш үздіксіз жанып тұрды. Күніне 15 шелек көмір кетеді. Тіпті, түнде келіп салып отырдым. Сонда да жылымады. Леденёва ФАП-ын жөндеуге 22 млн. теңге жұмсалды. Бұл жұмысқа тапсырыс берген де, оны қабылдап алған да аудандық аурухана. Олардың айтуынша, жобалық-сметалық құжатта жылыту жүйесі қарастырылмаған. Енді жаңа пешке бюджеттен бөлек қаржы бөлінеді. Марат Ескендіров, Мамлют аудандық ауруханасы директорының міндетін атқарушы: - Қазір «Жол картасы» әзірленді. Ол бойынша ФАП-тың жылыту жүйесі ауыстырылады. Басқа қазандық алынып, шойын құбырлар тартылады. Ал қазіргі пешті мердігер ұйым демеушілік ретінде орнатып берді. Леденёво ауылында 100-ден аса үй бар. Басы ауырып, балтыры сыздаған адамдар осы жалғыз ФАП-қа келіп ем алады. Сондықтан олар емдеу мекемесінің жылы болғанын қалайды. Авторлары: Айдарбек Айтмұхамбетұлы, Төлеген Иманов