Аудан орталығындағы жалғыз өткелдің ашылып-жабылуын аңдыған аралдық ағайын енді емін-еркін қатынайды, деп хабарлайды «Хабар 24». Өйткені пойыз өткен уақытта өткел жабылып, көлік кептелісі 3 шақырымға дейін созылады. Жүк немесе жолаушылар вагондары тіркелген құрамның кейде қатарынан екеуі өтеді. Ол кезде кідіру уақыты жарты сағаттан асып кетеді. Аралдықтардың тілегін айтып біздің арна тілшілері бірнеше репортаж түсірген еді. Байқағандарыңыздай нәтиже бар. Теміржолдың бергі бетіне 17, ал арғы жағына 20 мыңдай халық қоныстанған. Ауыл-аймақтан келіп-кететіні тағы бар. Жергілікті жұрттың ары-бері қатынайтын жалғыз өткелі – осы. Әсіресе жедел жәрдем мен өрт сөндіру техникалары қауырт сәтте жіпсіз байланады. Аралдық Берік Кәденов 7 жылдан бері шойынжол өткелін ашып-жауып, пойыздардың кедергісіз өтуін ұйымдастырады. Теміржолшы тәртіпке бағынғысы келмейтін шыдамсыз жүргізушілер көп екенін айтады. Берік Кәденов, теміржолшы: - Өткелден, жабық шлагбаумнан кейде асығыс қарамай, қапталынан өтіп кететін машиналар болады. Қауіпсіздік шаралары жағынан бізге қиындау. Енді бізге міндетті түрде көпір керек. Күніне шамамен 40-тай, кейде одан да көп пойыз өтеді. Пойыз да, көлік те көп. Тәуелсіздік алғалы дүркін-дүркін көтерілген мәселені жергілікті билік талай саралап, сала мамандарымен сараптап көрді. Алайда аспалы көпір салуға аудан тіпті облыс бюджетінің шамасы жетпегесін өткір мәселе шешімін таппай ысырыла берген. Ақыры қаржысы республикалық қазынадан бұйырыпты. Серік Сермағамбетов, Арал ауданының әкімі: - Қаржысының бір бөлігі биылға қарастырылып тұр. Соған былтыр конкурсын өткізіп қойдық, жеңімпаз анықталды. Келесі айдан бастап құрылысын бастайтын боламыз. Бұл жоба өзі 3 млрд 140 млн теңгені құрайды. Биыл 487 млн теңге бөлініп тұр, ертең нақтылау кезінде тағы да 1,5 млрд тг күтіп отырмыз. Келесі жылы осы жобаны іске асырып, пайдалануға береміз деген жоспарымыз бар. Сонымен екі жағынан жаяу жүргіншілер жолы мен түнгі жарық шамдары бар жаңа көпірдің ұзындығы 940 метрге созылады. Маңайдағы тұрғындардың тыныштығын алмас үшін дыбыс басқыш құралдары қоса орнатылады екен. Аралдықтардың ендігі тілегі бөлінген қаржы талан-таражға түспей, құрылыс сапалы әрі уақытында бітсе дегенге саяды. Авторлары: Қамбар Бекенов, Ақан Әлиев.