Жамбыл облысында әскери ұшқышсыз аппарат төтенше жағдайда жерге қонды

Қазақстан Қарулы Күштері Әуе қорғанысы күштерінің ұшқышсыз ұшу аппараты жоспарлы оқу-жаттығу ұшуын орындау барысында Жамбыл облысы Талас ауданы аумағында штаттан тыс жағдайда жерге қонды, деп хабарлайды «24KZ».

Қорғаныс министрлігінің хабарлауынша, оқиға 2 маусым күні болған.

«Қазақстан Республикасы Қарулы Күштері Әуе қорғанысы күштерінің ұшқышсыз ұшу аппараты жоспарлы оқу-жаттығу ұшуын орындау барысында Жамбыл облысы Талас ауданы аумағында штаттан тыс жағдайда жерге қонды», – делінген министрлік хабарламасында.

 Қорғаныс министрлігінің мәліметінше, оқиға салдарынан зардап шеккендер мен қираулар тіркелмеген. Сондай-ақ тұрғындар мен инфрақұрылым нысандарына ешқандай қауіп төнбеген.

 Алдын ала болжам бойынша, оқыс оқиғаға техникалық ақау себеп болуы мүмкін.

 Оқиғаның барлық мән-жайын анықтау үшін арнайы комиссия оқиға орнына жіберілді. Қазіргі уақытта ұшқышсыз аппарат қонған аумақты тексеру және оқиғаның себептерін анықтау жұмыстары жүргізіліп жатыр.