Жамбыл облысында 19 жастағы бойжеткен күйеуімен жанжалдан кейін өзіне қол жұмсаған

Жамбыл облысында 19 жастағы бойжеткен өзіне қол жұмсады. Қайтыс болар алдында ол құрбысына күйеуімен арасындағы жанжалдар туралы жазып, ұрып-соққанына шағымданған және отбасынан кеткісі келетінін айтқан, деп хабарлайды «24KZ».

Қайтыс болған Мадина Рашидқызы Өзбекстан азаматы екен. Ол Меркі ауданында күйеуімен бірге шамамен екі жыл тұрған. Ерлі-зайыптының артында сегіз айлық баласы қалды.

Қайтыс болған қыздың құрбысы Зейнеп Threads желісінде бойжеткеннің отбасындағы жанжалдар туралы бірнеше рет айтқанын және күйеуінің ұрғанын мәлімдеген. Зейнептің айтуынша, ол марқұмның денесіндегі көгерген жерлерді өз көзімен көріп, жарақаттардың суреттерін алған.

Қайтыс болар алдында Мадина күйеуімен болған жаңа ұрыс туралы жазған. Құрбысының айтуынша, жанжал балаға сатып алынған, бірақ қыздың өзі жеп қойған тәттінің кесірінен шыққан. Жазба алмасу кезінде Мадина күйеуінің осы үшін ұрғанын айтқан. Келесі күні ол жинап қойған заттарының суретін жіберіп, отбасынан кетіп, ажырасқысы келетінін жазған.

Содан кейін Мадина құрбысынан 15 мың теңге қарызға сұраған. Зейнептің айтуынша, оның қолында қажетті сома болмаған, бірақ кейін оған Мадинаның қайтыс болғаны туралы хабарлаған.

Жамбыл облысы ПД мәлімдегендей, кісі өлімі фактісі бойынша өзін-өзі өлтіруге дейін жеткізу бабымен сотқа дейінгі тергеу басталды.

Қазіргі уақытта болған оқиғаның барлық мән-жайларын анықтауға бағытталған қажетті тергеу әрекеттері жүргізіліп жатыр. Қазақстан Республикасы Қылмыстық-процестік кодексінің 201-бабына сәйкес өзге ақпарат тергеу мүддесі үшін жариялауға жатпайды, - деп толықтырды ведомстводан.