Қарағанды облысында түнімен боран сейілген жоқ. Ат құлағы көрінбейтін ақтүтек салдарынан барлық бағыттағы жолдар жабылды, деп хабарлайды «Хабар 24».
Құтқарушылардың ескертуіне құлақ аспай, сапарға шығып кеткендер бар. Мәселен, Теміртау – Нұр-Сұлтан бағытында түнде біраз көлік соқтығысып, кептеліс болса, республикалық маңызы бар өзге де жолдарда 9 адам далада қалған. Осакаров елді мекенінің маңынан 3 адам және Қарқаралы тас жолынан 6 адам қар құрсауынан шығарылып, қауіпсіз жерге жеткізілді.