Аяғы ауыр әйел мінген жедел жәрдем көлігі боранда қалды

Қарағанды облысының Шет ауданында жедел жәрдем көлігі жолда қар құрсауында қалып қойды. Дәрігерлер ауылдан қалаға инфаркт алған ер адам мен босану мерзімі жеткен аяғы ауыр әйелді алып келе жатқан.

25 ақпанда Шет ауданында жедел жәрдем көлігінің қар құрсауында қалып қойғаны туралы хабарлама келіп түсті. Оқиға орнына құтқарушылар шықты. «Қызылқой ауылына қарасты Алматы-Екатеринбург тас жолында қар құрсауында тұрып қалған жедел жәрдем көлігі мен жеңіл автокөліктен 9 адам құтқарылды. Қарағанды облысының ТЖД және Апаттар медицинасы орталығының күшімен құтқарылған адамдар, оның ішінде екі науқас: инфаркті бар ер адам және босану мерзімі жеткен жүкті әйел Қарағанды қаласына жол талғамайтын көлікпен жеткізілді», - деп мәлімдеді Қарағанды облыстық ТЖД баспасөз қызметі.