ШҚО-да екі адам суға батып кетті

Шығыс Қазақстан облысында екі адам суға батып кетті, деп хабарлайды ҚазАқпарат.

ШҚО ТЖД баспасөз қызметінің мәліметінше, 17 маусым күні екі бірдей қайғылы оқиға болған.

«Күршім ауданындағы Зайсан көлінде 1995 жылғы жігіт суға кетті. Қайық аударылып түскенде ол жүзе алмағандықтан судан шыға алмай қалған. Екінші оқиға Шемонаиха ауданында болды. 14 жастағы жасөспірім достарымен бірге тереңдігі 1 метр 20 сантиметрге жететін карьерге жиналып қалған қар суына шомылып жүрген. 2 метрдей биіктіктен суға секірген бала жүзіп шыға алмай қалып, сол жерде жантәсілім етті», - деп хабарлады ведомство өкілдері. Осы ретте департамент мамандары өңір жұртшылығына арнайы жабдықталмаған су айдындарында шомылудан аулақ болуға шақырады.