Алматы облысында сегіз пәтерлі үй өртенді

Алматы облысының Талғар ауданындағы Төңкеріс ауылында 8 пәтерлі үй өртенді. Тұрғындар дер кезінде үйден шығып үлгерген, өрттен ешкім зардап шекпеген, деп хабарлайды ҚазАқпарат.

«Кеше таңертеңгі уақытта  8 пәтерлі барак типті үй өртенді. 8 пәтердің 6-уын өрт шалды, оның ішінде екеуінің шатыры жанған. Абырой болғанда, тұрғындар дер кезінде үйден шығып үлгерді. Белгілі болғандай, барак типті үйде барлығы 34 адам тұрады. Оның 16-сы бала»,- делінген Талғар ауданы әкімінің баспасөз қызметінің хабарламасында.

Ведомствоның ақпаратына сәйкес, үйдің аумағы 288 шаршы метр. Үй 1952 жылы қамыстан салынған.

Әкімдіктің мәліметінше, үйі өртенген отбасыларға мемлекет есебінен көмек беру мәселесі қаралады. Қазіргі кезде тұрғындар туыстарын паналаған. Өтініш білдірген жағдайда уақытша пәтерге орналастыру жағы қарастырылады. Қазіргі кезде өрттің себебі анықталып жатыр.