Семейде іздеуде жүрген қылмыскер ұсталды

Тәртіп сақшылары үй тонағаны үшін Семей қалалық соты іздестіп жатқан 34 жастағы ер адамды ұстады.

Бұл туралы ШҚО ПД баспасөз қызметінен мәлім болды. «Қылмыскер бір жыл бұрын жер үйлердің біріне терезе арқылы кіріп, одан жарты миллион теңге мен алтын бұйымдарды ұрлап кеткен. Бірақ сол кезде оны табу мүмкін болмады. Бүгінде ол уақытша ұстау изоляторына қамауға алынған», – делінген ақпаратта. Бұдан бөлек, Ұлан ауданында 38 жастағы ер адам пробация қызметінен жасырынып жүрген. Ол 2019 жылдың 6 қаңтарында таңғы уақытта танысымен бірге өскемендік азаматтың пәтерін бұзып кірген. Пәтер иесін пышақпен қорқытып, үйді тонап кетті. «Сот үкімі бойынша ол шартты түрде бас бостандығынан айырылып, пробация қызметінің есебіне алынған. Алайда біраз уақыттан кейін бақылаудан жасырынып, қашып жүрді. Полиция қызметкерлері сотталғанның қайда екенін анықтап, қолға түсірді. Қазіргі уақытта оған қатысты сот шешімі күтілуде», – делінген хабарламада.