Жол-көлік оқиғасы Катаев көшесінде орын алған, деп хабарлайды Pavlodarnews.kz.
Облыстық полиция департменті баспасөз қызметінің мәліметінше, 3 шілде күні сағат 22:30-да «Volvo» автокөлігінің жүргізушісі кәмелетке толмаған жаяу жүргіншіні қағып кетті.
- Салдарынан жаяу жүргінші облыстық балалар ауруханасына жатқызылды. Жол-көлік оқиғаларының барлығы көлік құралдары жүргізушілерінің кінәсінен орын алады. Көбі жол қозғалысы ережелері мен қарапайым қауіпсіздік шараларын елемей, жол ережесін өрескел бұзады. Нәтижесінде мұның бәрі қайғылы жағдайға әкеледі, - дейді департаментте.
Облыстық денсаулық сақтау басқармасында 2010 жылы туған жасөспірім травматология бөліміне жатқызылғанын хабарлады.
- Бас миының жабық жарақаты, оң жақ жамбас буынының көгеруі тіркелді. Толық көлемде ем тағайындалып, бақылауға алынды. Жағдайы орташа тұрақты деп бағаланады, - дейді басқармада.
Айта кетерлігі, биылғы жылдың басынан бастап Павлодар қаласының аумағында 124 жол-көлік оқиғасы тіркелді, онда 161 адам зардап шекті және алты адам қайтыс болды.