378,17 430.15 5.89
+7 (7172) 757 485 24kz@khabar.kz
ҚАЗ

Өмірзақ Шөкеев Түркістан облысының әкімі болып тағайындалды

  • 557
  • UPD: 20:26, 26.02.2019

Елбасы Жарлығымен Өмірзақ Естайұлы Шөкеев Түркістан облысының әкімі қызметіне тағайындалды.

Бұл туралы Ақорданың баспасөз қызметі хабарлайды.

Осыған дейін, Шөкеев Ауыл шаруашылығы министрі және Премьер-министрдің орынбасары қызметін қоса атқарған. Оның орнына бұрынғы Мәжіліс депутаты Сапархан Омаров тағайындалды.

 

Мемлекет басшысының Жарлығымен Жансейіт Қансейітұлы Түймебаев Түркістан облысының әкімі қызметінен босатылды.

Бүгін ҚР Президенті Нұрсұлтан Назарбаевтың тапсырмасымен Премьер-министр Асқар Мамин жұмыс сапарымен Түркістан облысына барды, онда облыстық мәслихаттың кезектен тыс сессиясына қатысты.

А.Мамин сессия барысында мәслихат депутаттарына Мемлекет басшысының Ө.Шөкеевті Түркістан облысының әкімі лауазымына тағайындау ұсынысы туралы хатын оқып берді. Дауыс беру қорытындысы бойынша депутаттар Президент ұсынған кандидатураны бірауыздан қолдады.

Өмірзақ Естайұлы Шөкеев 1964 жылы Түркістанда дүниеге келген. Мәскеу экономикалық-статистикалық институтын тәмамдаған. Жоғары жауапты лауазымдарда жұмыс істеген, атап айтсақ: Оңтүстік Қазақстан және Қостанай облыстарының әкімі, ҚР экономика және сауда министрі, ҚР Президентінің Әкімшілігі басшысының орынбасары, Астана қаласының әкімі, ҚР Премьер-Министрінің бірінші орынбасары, «Самұрық-Қазына» АҚ басқарма төрағасы. 2017 жылғы желтоқсаннан бастап ҚР Премьер-министрінің Орынбасары — Ауыл шаруашылығы министрі қызметін атқарған.

Премьер-министр Түркістан облысының активімен өткен кездесуде Ж.Түймебаевқа атқарған жұмысы үшін алғыс білдірді. Түркістан қаласының алғашқы әкімі ретінде ол облыс орталығын Түркістан қаласына көшіру, жаңа облыстың әкімшілік-аумақтық құрылымын ұйымдастыру, көші-қон мәселелерін, жаңа қаланың ауқымды құрылыс жұмыстарын ұйымдастыру бойынша бірқатар жұмыстарды атқарды.

«Түркістан облысының дамуы Елбасының ерекше назарында. Мемлекет басшысының бастамасымен қасиетті Түркістан қаласында жаңа үлкен құрылыс басталды», - деп А.Мамин, жергілікті атқарушы органдар алдында жаңа қаланың жаңғыруын уақытылы қамтамасыз етіп, бүкіл түркі әлемінің мәдени-рухани астанасы ретінде өркендету және оны қарқынды дамыту, жаңа жұмыс орындарын ашу, азаматтардың әлеуметтік жағдайын жақсарту бойынша үлкен жауапкершілікті жүктейтін міндеттер қойылғанын атап өтті.

Хабар 24 телеарнасы