425,85 504.32 5.81
+7 (7172) 757 485 24kz@khabar.kz

Үкімет шектеу қойылған кепілдіктегі активтерді экономикалық айналымға қайтару туралы заң жобасын әзірлеп жатыр — Ә. Ерғалиев

  • 93
  • UPD: 14:15, 07.09.2021

ҚР Премьер-Министрі Асқар Маминнің төрағалығымен өткен Үкімет отырысында ҚР Президенті Қасым-Жомарт Тоқаевтың 2021 жылғы 1 қыркүйектегі «Халық бірлігі және жүйелі реформалар – ел өркендеуінің берік негізі» Жолдауын іске асыру жөніндегі Жалпыұлттық іс-шаралар жоспары қаралды. Ұлттық экономика министрі Әсет Ерғалиев баяндама жасады. 

Министрдің айтуынша, Жалпыұлттық жоспардың жобасы 102 іс-шараны қамтиды. Бұл жолдау халқымыздың әл-ауқатын арттыруға бағытталған 5 бастаманы және 7 бағытты іске асыруды көздейді.

Бірінші бағыт бойынша 27 іс-шараны іске асыру көзделген.

«Кәсіпкерлікті дамыту үшін «Қарапайым заттар экономикасы» және «Бизнестің жол картасы» бағдарламаларын 2022 жылы іске асыру жалғасатын болады. Жалпы алғанда, қаржыландыру көлемі кемінде 1 трлн теңгені құрайды», — деді Ә. Ерғалиев.

Мемлекет қаржысының тиімділігін арттыру мақсатында Мемлекет қаржысын басқару тұжырымдамасы әзірленетін болады. Тұжырымдама бюджет саясатын, мемлекеттік борышты басқару, сондай-ақ Ұлттық қордың қаражатын қалыптастыру және пайдалану мәселелерін қамтиды. Сонымен қатар «Өндірушіден тұтынушыға дейін» тізбегі бойынша бағаларды бірыңғай бақылау үшін негізгі мемлекеттік орган айқындалатын болады.

«Жеке қосалқы шаруашылықтар туралы» Заң әзірленетін болады. Ауыл шаруашылығында субсидиялау тетіктерін ұзақ мерзімге бекіту көзделіп отыр.

Цифрландыру жөніндегі ұлттық жобаның аясында кемінде 100 мың жоғары білікті АТ-маманын даярлау, цифрлық саладағы қызметтер мен тауарлардың экспортын 2025 жылға қарай кемінде $500 млн дейін жеткізу жоспарлануда.

«Инвесторларға кешенді сервистік қолдау көрсету мақсатында Ұлттық геологиялық қызмет құрылады. Шектеу қойылған кепілдіктегі активтерді экономикалық айналымға қайтару туралы заң жобасы әзірленетін болады», — деді Ә. Ерғалиев. 

Сондай-ақ отандық өнеркәсіп үшін шикізат тауарлар бағасының қолжетімділігін және көлемінің жеткіліктілігін қамтамасыз ету бойынша шаралар әзірленеді.

Екінші бағыт бойынша 8 іс-шараны іске асыру жоспарлануда. Министрдің айтуынша, Дүниежүзілік денсаулық сақтау ұйымы тіркеген вакциналарды сатып алу жеделдетіледі.

Медициналық бұйымдарға зертханалық және техникалық сынақтар жүргізу орталығын құру көзделіп отыр. «Дені сау ұлт» ұлттық жобасы шеңберінде кемінде 12 санитариялық-эпидемиологиялық сараптама зертханасы жоғары технологиялық жабдықпен қамтамасыз етіледі. Бұған қоса, отандық тауар өндірушілермен оффтейк-келісімшарттардың көлемі мен номенклатурасы кеңейтілетін болады.

Үшінші бағыт бойынша 12 іс-шара іске асырылатын болады. Типтік оқу жоспарларын алып тастау бойынша «Білім беру туралы» Заңға өзгерістер енгізіледі. Мұғалімдерді 3 жылда бір рет қайта даярлықтан өткізуді ұйымдастыру жоспарлануда. Сонымен қатар қашықтан білім беруге қажетті ақпараттық жүйенің сапасын жақсарту, сонымен бірге «Цифрлы ұстаз» жобасы іске асырылады.

«Дарынды балаларға және олардың ұстаздарына жан-жақты қолдау көрсетіледі. Халықаралық пән олимпиадаларының жүлдегерлеріне гранттар беру, сонымен бірге бір реттік ақшалай сыйақы да төлеу көзделуде», — деді Ә. Ерғалиев.

Мектептердегі орын тапшылығы проблемаларын шешу үшін 2025 жылға дейін кемінде 1000 мектеп салу жоспарлануда. «Жас талап» жобасы аясында сұранысқа ие мамандықтар бойынша тегін техникалық және кәсіптік біліммен толық қамтамасыз ету көзделіп отыр.

Министрдің сөзінше, төртінші бағыт бойынша 22 іс-шараны іске асыру көзделген.

«Агломерацияны дамыту туралы» Заң әзірленетін болады.

Жалпыұлттық басымдықтарға сәйкес Өңірлердің даму жоспарларын өзектендіру көзделген. 

Стратегиялық инвесторларымен бірлесіп, елімізде кем дегенде 2400 мегаваттық жаңартылатын қуат көзі іске қосылады.

«Еліміздің аса ластанған 10 қаласын орта мерзімді кезеңде газға немесе баламалы қуат көздеріне көшіру жоспарлануда», — деді Ә. Ерғалиев. 

Өңірлерді дамытудың ұлттық жобасы аясында 5 жыл ішінде барлық қалалар мен ауылдар таза ауыз сумен қамтамасыз етіледі. Сондай-ақ су ресурстарын ұқыпты пайдалану мақсатында 120 арна реконструкцияланады және 9 жаңа су қоймасы салынады.

Бюджет үдерістерін жеңілдету, бюрократияны барынша азайту және цифрлық тәсілдерді қолдануды кеңейту бойынша заңнамаға түзетулер енгізілетін болады. Абаттандыру және тұрғын-үй коммуналдық шаруашылығының бюджетіндегі «халық қатысатын» үлесін арттыру жоспарда бар.

Бесінші бағыт бойынша 6 іс-шара көзделген. «Кәсіби біліктіліктер туралы» Заң және жұмыспен қамтудың жаңа үлгілерін реттеу тетіктері әзірленетін болады. Көші-қон саясатының жаңа тұжырымдамасы әзірленеді. Еліміздің оңтүстігінен солтүстігіне көшіп жатқан азаматтарға жәрдемақы бөлудің қолданыстағы тәсілдерін қайта қарау қарастырылған.

Алтыншы бағыт бойынша 13 іс-шараны іске асыру көзделген. Министрдің айтуынша, ауылдық жерлердегі азаматтық бастамаларды қолдаудың тиімді тәсілдері әзірленеді.

«Депутат мандатын бөлу кезінде квотаны міндетті түрде ескеру бойынша талап заң жүзінде бекітілетін болады. Сонымен қатар квота бөлінетін азаматтар санатының тізімін кеңейту жоспарлануда», — деді Ә. Ерғалиев.

Сонымен қатар сыбайлас жемқорлықпен тиімді күресті жалғастыру мақсатында орта мерзімді кезеңге арналған тиісті стратегиялық құжат бекітіледі.

Отбасылық және гендерлік саясат тұжырымдамасына өзгерістер енгізілетін болады. Алаяқтыққа және қаржы пирамидаларына қарсы кешенді шаралар әзірлеу жоспарлануда.

Жетінші бағыт бойынша 5 іс-шараны іске асыру көзделеді.

Жаңа мәдениеттің дарынды өкілдерін дәріптеуге бағытталған нақты шараларды әзірлеу жоспарлануда.

Креативті индустрияны қолдау қорын құру мүмкіндігі қарастырылатын болады.

«Ұлттық рухани жаңғыру» ұлттық жобасы аясында отаншылдық, білімге құштарлық және еңбекқорлық сияқты қасиеттерді дәріптеу бойынша шаралар әзірлеу көзделіп отыр.

Халқымыздың әл-ауқатын арттыруға бағытталған Мемлекет басшысының 5 бастамасын іске асыру мақсатында келесі іс-шаралар жүзеге асырылады.

Бірінші, 2022 жылғы 1 қаңтардан бастап ең төменгі жалақы 60 мың теңгеге дейін көтеріледі.

Екінші, бизнесті жұмысшыларының еңбекақысын көбейтуге ынталандыру бойынша шаралар әзірленеді.

Үшінші, микро және шағын кәсіпкерлік үшін еңбекақы төлеу қорынан бірыңғай төлем енгізу жоспарлануда.

Бұл жиынтық бизнеске салмақты 34 пайыздан 25 пайызға төмендетуге мумкіндік береді.

Төртінші, 2022 жылдан 2025 жылға дейін жекелеген санаттағы азаматтық қызметкерлердің жалақысын жыл сайын орта есеппен 20 пайызға ұлғайту көзделген.

Бесінші, зейнетақы жинағының жеткілікті мөлшерінің шегінен асатын бөлігін тұрғын-үй сатып алу үшін «Отбасы банктегі» есепшотына аударуға рұқсат беру мүмкіндігі беріледі.

«Ұлттық экономика министрлігі орталық және жергіліктік атқарушы органдармен бірлесіп Жалпыұлттық жоспардың уақытылы және сапалы орындалуын қамтамасыз ету, ақпараттық-түсіндіру жұмыстарын жүйелі жүргізу, сонымен бірге іс-шараларды жузеге асырудың тұрақты мониторингін жасау бойынша тиісті жұмыстар жүргізетін болады», — деп түйіндеді Ә. Ерғалиев.

Хабар 24 телеарнасы