Нұрлан Нығматулин Мәжілістің биылғы жұмысын қорытындылады

Парламент Мәжілісінде жыл бойы қаралған 80 заң жобасының 39-ы мақұлданып, Сенатқа жіберілді, деп хабарлайды Хабар 24.

Мақұлданған құжаттардың қатарында елдің өнеркәсіптік саясаты, бәсекелестікті дамыту, мемлекеттік сатып алу, жер қойнауының қазба байлығы және табиғи монополиялар субъектілеріне қатысты жобалар бар. Сондай-ақ, биыл мәжіліс депутаттары адам құқықтары жөніндегі уәкіл туралы, сот жүйесі және судьялардың мәртебесі туралы, құқық қорғау органдары, прокуратура және соттың өкілеттігін өзара бөлудің үшбуынды моделіне бағытталған ірі заң жобаларын қабылдады.

«Бүгін осы жылдың және жалпы екінші сессияның кейбір нәтижелеріне тоқталмақпын. Ерекше айту керек, аз уақыт бұрын Қазақстан Тәуелсіздігіне 30 жыл толды. Осы 30 жылдың әрбір белесі біз үшін қайталанбас тарих. Бұл жолда біздің Парламент өзіне жүктелген жауапкершілікті абыроймен атқарып, еліміздің саяси-экомикалық, әлеуметтік, мәдени дамуының заңнамалық тірегі болып келеді. Біз қабылдаған әрбір құжат, ең алдымен, еліміздің экономикасын арттыруға, халықтың әлеуметтік жағдайын, соның ішінде өнеркәсіп, денсаулық, білім салаларын жақсартуға арналып келеді», – деді Н. Нығматулин палатаның жалпы отырысында.

Сонымен бірге ол биыл шағын және орта бизнес, экология мәселелеріне де ерекше назар аударылғанын атап өтті. «Осының барлығы Тұңғыш Президент-Елбасы Нұрсұлтан Назарбаевтың стратегиялық тапсырмаларын және Мемлекет басшысы Қасым-Жомарт Тоқаевтың бастамаларын сапалы заңдармен қамтамасыз етуге бағытталып отыр. Алдымызда әлі де көптеген маңызды міндеттер тұр. Біз келесі жылы да қалыптасқан тәжірибені, мүмкіндікті пайдалана отырып, еліміздегі реформаларды және өзгерістерді тиісті заңдармен қамтамасыз етеміз деп сенеміз», – деді Мәжіліс төрағасы. Осы орайда ол депутаттарға, Мәжіліс аппаратының қызметкерлеріне бірлескен жұмыстары үшін алғыс айтты. 2022 жылы ауқымды жұмыс күтіп тұрғанына тоқталған Н. Нығматулин, барша фракцияның, депутаттардың бірлескен жұмысының арқасында Мәжіліс сапалы әрі тиімді заңнамалық қолдауды қамтамасыз ететініне сенімді екенін айтты.