476,27 474,60 7,83
+7 (7172) 757 485 24kz@khabar.kz

ҰҚШҰ-ның мерейтойлық саммитінен кейін Қазақстан мен Ресей басшылары кездесті

  • 183
  • UPD: 09:03, 17.05.2022

ҰҚШҰ-ның мерейтойлық саммиті аяқталғаннан кейін Президент Қасым-Жомарт Тоқаев Владимир Путинмен кездесті, деп жазды Борт №1 телеграм арнасында.

Кездесу барысында екіжақты қарым-қатынастардың өзекті мәселелері, соның ішінде сауда-экономикалық ынтымақтастық саласы мен алдағы іс-шаралар кестесі талқыланды. Ресейлік компаниялар Қазақстан экономикасына былтыр 17 миллиард доллар инвестиция құйды. Өткен жылы тауар айналым 34 жарым процентке өсті. Қалыптасқан қазіргі ахуалға қарамастан көрсеткіштерді жақсы деп бағалауға болады.

«Шын мәнінде, елдеріміз арасындағы сауда-экономикалық және саяси ықпалдастықтың қарқыны нашар деуге еш негіз жоқ. Тауар айналымы 25 миллиард долларға жетті. Ресей – Қазақстан үшін сауда-экономикалық саладағы басты серіктес. Осы себепті мен Үкіметімізге осы қарқынды және сауда мен инвестициялар көлемін сақтап қана қоймай, қазіргі геосаяси жағдайдағы барлық қиындықтарға қарамастан оларды арттыру жөнінде міндет жүктеймін. Мен өзіммен бірге осы салаға жауапты Премьер-министрдің бірінші орынбасары бастаған Үкіметтің негізгі шенеуніктерін ала келдім. Олар табысты келіссөздер жүргізді және нақты нәтижеге қол жеткізу үшін олардың алдына Федерациясының Үкіметімен іскерлік бағытта жұмыс істеу міндеті қойылды және олар нәтижелі келлісөз өткізді», – деді Қасым-Жомарт Тоқаев. Қазақстан Президенті бүгінде машина жасау, металлургия, химия өнеркәсібі сияқты салаларда жалпы құны 4 миллиард доллар болатын 20 ірі жобаның әртүрлі сатыда жүзеге асырылып жатқанын айтты. Ресей Президенті өз кезегінде екі ел арасындағы сауда-экономикалық ынтымақтастықты дамытудың оң қарқынын атап өтті. «Жалпы бізде барлық сала жақсы дамып келеді. Былтыр тауар айналымының өсімі 34 процент болды. Ресей компаниялары Қазақстан экономикасына 17 миллиард доллар инвестиция салды. Бәрімізге түсінікті әрі белгілі қазіргі қиыншылықтарға қарамастан, жағдай жақсы дамуда», – деді Владимир Путин. Тараптар күн тәртібіндегі екіжақты кешенді экономикалық мәселелердің бәрін биыл күзде Орынборда өткізуге жоспарланған Аймақаралық форумда талқылауға уағдаласты. Қасым-Жомарт Тоқаев Владимир Путиннің шақыруы бойынша биылғы маусым айында Петербургте өтетін экономикалық форумға қатысатынын нақтылады. Сонымен қатар Қазақстанның үкіметтік делегациясы Екатеринбургте өтетін ірі өнеркәсіптік көрмеге қатысуды жоспарлап отыр.

Хабар 24 телеарнасы