Былтыр біраз бастама көтерілген еді. Солардың дені осы жылы жүзеге асты, деп хабарлайды Хабар 24. Әуелі саяси партияларды Мәжіліске өткізу тәртібі өзгергенін айтқан жөн. Бұрын шегі 7 процент болатын еді. Биыл соны 5 процентке дейін төмендетті. Енді сайлауда бұқараның 5 процент қолдауына ие болған саяси партиялар Мәжілісте орын алады. Бюллетеньде «бәріне қарсымын» деген нұсқа пайда болды. Ал депуттаттық мандат бөлу кезінде оларға 30 проценттік квота беріледі. Биылғы жылдан бастап мүгедек жандар да осындай мүмкіндікке ие болды. Қасым-Жомарт Тоқаев, Қазақстан Республикасының Президенті: – Біз инклюзивті қоғам құрып жатырмыз. Ерекше қажеттілігі бар тұлғалар әзірге еліміздің қоғамдық-саяси өмірінде көп емес. Квота бөлінетін азаматтар санатының тізімін кеңейтуді ұсынамын. Онда жастар мен әйелдерден бөлек, ерекше қажеттілігі бар азаматтарға да квота белгілеу керек. Президент сот жүйесін жетілдіруді тапсырды. Полицияның сервистік моделінің ауқымын кеңейтуді міндеттеді. Пилоттық жоба биыл табысты аяқталған. Енді келесі жылдан бастап бұл жұмыс тәсілі бүкіл ел бойынша қолға алынады. Сосын есте қалғаны, елде өлім жазасын жоюды көздейтін заң жобасы қабылданды. Мемлекет басшысы маңызды құжатқа осыдан 4 күн бұрын ғана қол қойды. Қасым-Жомарт Тоқаев, Қазақстан Республикасының Президенті: – Бұған дейін менің бастамам бойынша біздің еліміз өлім жазасын жоюға бағытталған Азаматтық және саяси құқықтар туралы халықаралық пактінің екінші факультативтік хаттамасына қосылды. Өлім жазасының күшін жою ешқандай ескертпелерсіз қабылдануы керек.