Оралда Туризм және спорт министрлігінің кубогы үшін жарыс басталды
Бүгін Оралдағы «Жайық Арена» спорт кешенінде Туризм және спорт министрлігінің кубогы жолындағы жарыс басталды. Сайысқа елдегі 17 спорт мектебінің жасөспірімдері қатысып жатыр. 400 атлет 3 күн бойы бокс, дзюдо, еркін және грек-рим күресі мен таеквондодан сынға түседі, деп хабарлайды 24KZ.
Министрлік кубогы 5-ші рет ұйымдастырылып жатыр. Жарыс тарихында Қажымұқан Мұңайтпасов атындағы республикалық мамандандырылған мектеп-интернат колледжінің өрендері 3 рет топ жарды. Олар бұл жолы да тыңғылықты дайындықпен келгендерін айтады.
Бекзат Амантай, Қажымұқан атындағы республикалық мектеп-интернат-колледжінің шәкірті:
– Мен өзім бокспен 9 жасымнан айналысам. Бұған дейін спорт мектебіне 9 класс кезімде түскем. Біз бұған дейін Министр кубогын 3 дүркін жеңіп алғанбыз және 4 алтынға келіп отырмыз. Жаңа Жамбыл облысымен шықтық, 6-1 есебімен ұттық.
Ермек Қоспанов, ҚР Туризм және спорт министрлігінің басқарма басшысы:
– Республика бойынша 20 мектеп-интернат колледжі бар. Соның бүгінгі күні 17 командасы қатысып отыр. Биыл барлық командалар жақсы деңгейде дайындалып келген. Бәсеке өте жоғары. Бұл жарыстың негізгі мақсаты – еліміз бойынша спорт резервін қалыптастыру, еліміздің намысын қорғап, жақсы жетістікке жету үшін оларға бірден-бір тәжірибе болып табылады.
