Еуропа лигасының биылғы маусым жеңімпазы белгілі болды. Бұл жолы «Вильярреал» командасының асығы алшысынан түсті.
Финалдық кезеңде Унаи Эмери шәкірттері пенальтиден тағдыршешті голды соқты. Мачтың негізгі бөлігінде қарсыластар бір-бірінен айласын асыра алмай, біраз ырғасты. Дегенмен «Вильярреал» ойыншылары батылдық танытып, алғаш болып есеп ашты. Авторы – шабуылшы Жерар Морено. Алайда «қызыл сойқандар» екінші таймда-ақ оған жауап қайырды. Есеп – 1:1. Қосымша уақытта да ойын бірсыдырғы өрбіді. Тек пенальтиден доп тебу кезінде «Вильярреал» ойыншылары бір ұпаймен басым түсті.
Айта кетейік, команда халықаралық турнирде алғаш рет топ жарып отыр.