Жәнібек Әлімханұлы жыл соңына дейін Мунгиямен жекпе-жек өткізуі қажет

Орта салмақта өнер көрсететін Жәнібек Әлімханұлы (10-0, 6 КО) жыл соңына дейін 24 жастағы мексикалық боксшы Хайме Мунгиямен (37-0, 30 КО) кездесуі қажет, деп хабарлайды «Хабар 24» Vesti.kz-ке сілтеме жасап.

Қазақстандық боксшыға мұндай мүмкіндік америкалық Роб Брандтты (26-3, 18 КО) жеңгеннен кейін беріліп отыр. 

Кездесу алдында өткен ресми салмақ өлшеу рәсімінде Top Rank промоутерлік компаниясының басшысы Боб Арум жеңімпаз жыл соңына дейін Мунгиямен шаршы алаңға шығатынын айтқан еді. Ал ол кездесудің жеңімпазы чемпиондыққа таласады. 

Естеріңізге сала кетейік, Әлімханұлы Брандтты техникалық нокаутпен мерзімінен бұрын жеңді.