424,51 504.55 5.79
+7 (7172) 757 485 24kz@khabar.kz
ҚАЗ

Дания 29 жылда алғаш рет Еуропа чемпионатының жартылай финалына шықты

  • 105
  • UPD: 08:18, 04.07.2021
Дания 29 жылда алғаш рет Еуропа чемпионатының жартылай финалына шықты

Дания құрамасы футболдан Еуропа чемпионатының жартылай финалына жолдама алды, деп хабарлайды ҚазАқпарат.

Екі құрама бұған дейін 11 мәрте кездесті. Оның 3-інде Чехия басым түсіп, 2-інде Дания жеңсе, қалғанында тең есеп тіркелді. Соңғы рет Чехия Данияны 2004 жылдың 27 маусымында Еуропа чемпионатының 1/4 финалында 3:0 есебімен жеңген болатын. Содан бергі алты кездесудің бесеуінде тең есеп тіркеліп, біреуінде Дания жеңіске жетті.

Бүгінгі кездесуде екеуінің де жеңіске жету мүмкіндігі бірдей болды. Дегенмен, алғашқы екі голды даниялықтар соқты. Ойынның 5-минутында Томас Дилейни мергендік танытса, 42-минутта Каспер Дольберг есепті үстемелей түсті. Екінші кезең басталғаннан чехтар алға қарай ұмтылды. Олардың қатарынан Патрик Щик 49-минутта есеп айырмасын қысқартты. Ол футболшының құрлықтық дода барысында соққан бесінші голы. Сұрмергендер көшінде осылайша португалдық Криштиану Роналдумен теңесті. Нәтижесінде Дания қарсыласын 2:1 есебімен жеңіп, жартылай финалға жолдама алды.

Еске салсақ, Дания бұдан бұрын құрлықтық додада 1992 жылы чемпиондық атаққа қол жеткізген еді. Содан бергі уақытта жартылай финалға шыққан емес. Осылайша 29 жыл бұрынғы жетістігін қайталауға жақындап келеді. Жартылай финал ойындары 6 және 7 шілде күндері өтеді. Алдымен 6 шілдеде Италия мен Испания шеберлік байқасады. Ал 7 шілдеде Украина мен Англия жұбының жеңімпазымен кездеседі. Финал 11 шілдеде Англия астанасы Лондон қаласындағы «Уэмбли» стадионында өтеді.

Хабар 24 телеарнасы