Айдосқа екінші мүмкіндік берілді. Қазақстандық кәсіпқой боксшының кезекті кездесуіне қатысты спорт сарапшылары осындай пікір айтуда, деп хабарлайды «Хабар 24».
Орта салмақтағы Айдос Ербосынұлы 12 қыркүйекте шаршы алаңға шығады. Оның қарсыласы – гаяналық Аллен Леннокс. Ол бүгінге дейін 24 кездесу өткізіп, 22-сінде жеңіске жеткен. Ал Айдостың көрсеткіші – 15 жекпе-жек, 15 жеңіс. Бұл бокс кеші жерлесімізді әлем чемпион болсам деген арманына бір табан жақындата түседі. Әрине, егер Айдос жеңіске жетсе.
Айта кетейік, ол ең соңғы жекпе-жегін былтыр желтоқсанда өткізді. Ганалық Исса Самирді ұтып, 3 бірдей аралық чемпиондық белдігін қорғап қалды. Одан кейін 17 сәуірде ресейлік боксшымен жұдырықтасуы керек еді. Бірақ аяқасты ауырып, кездесу болмай қалды.