434.16 493.30 5.87
+7 (7172) 757 485 24kz@khabar.kz

Еліміздің бокс федерациясы чемпиондарды марапаттады

  • 128
  • UPD: 20:05, 18.11.2021

Бүгін  Алматыда Ұлттық олимпиада коммитетінің мамандары мен Қазақстан Бокс федерациясының басшылары соңғы әлем чемпионатында жүлде алған боксшыларды марапаттады, деп хабарлайды «Хабар 24». 

Жақында ғана Сербия жерінде өткен дүниежүзілік додада Қазақстан құрамасы 2 алтын, 2 күміс, 1 қола медаль иеленіп, жалпы командалық есепте екінші орыннан көрінген еді.

Тәуелсіздік алған жылдан бері қазақ боксшыларының кез келген дүбірлі додадан қоржыны бос қайтқан емес. Жеңіске етіміз үйреніп алғаны сондай, алтын алмасақ ашуланатын хәлге жеттік. Биыл Токио олимпиадасындағы 2 қола медальды да қомсынғанымыз рас. Ал Белградқа барған жігіттер жігерлі мінезімен дараланып, жанкүйерлердің ыстық ықыласына бөленді. Сол дүниежүзілік жарыста асығы алшысынан түскен жігіттерді бүгін қауымдастық басшылары марапаттады.

Қайрат Сәтжанов, бокстан Қазақстан құрамасының бас бапкері:

– Көңіл-күй жақсы. Балалардың да көңіл күйі өте жақсы. Республиканың басшыларынан бөлек, облыстағы спорт басқармалары, әкімшілік бар қарсы алып жатыр балаларды. Келе салысымен бәрі қабылдап, қолдарынан келген сыйлықтарын беріп жатыр. Қуаныштымыз рахмет бәріне.

Әлем чемпионы болған Сәкен Бибосынов пен Теміртас Жүсіпов 70 мың АҚШ долларын алса, күміс жүлдегерлер Махмұд Сабырхан мен Серік Теміржановқа 50 мың, ал қола жүлдегер Абылайхан Жүсіповке 30 мың АҚШ доллары берілді. Тек қана жүлдегерлер емес әлем чемпионатына қатысқан өзге боксшылар да 800 мың теңгеден сыйақы алды. Бапкерлер мен команданың дәрігерлеріне де қаржылай сыйлық тағайындалыпты.

Абылайхан Жүсіпов, әлем чемпионатының қола жүлдегері:

– Іштегі арман олимпиаданың алтынын алу немесе әлем чемпионатының алтынын алу деген. Алдағы мақсат сол. Қазіргі сәтте нақты айта алмаймын. Алла қаласа бәрі жақсы болып жатса, деніміз сау болып жатса, бабымызда болып жатсақ міндетті түрде сол арманға қарай талпынып, тырысамыз.

Абылайхан әуесқой бокстан әлі кете қойған жоқ.Тағы да еңбек етіп, шың басына шығуды көздейді. 33 жастағы әлем чемпионы Теміртас Жүсіповтің де мақсаты осы. «Біздің жігіттер тәуелсіздігіміздің 30 жылдығына үлкен сый жасады. Енді келесі жылы Азия ойындарында да осы биіктен көрінеміз деген ойдамын. Ол үшін боксшыларға барлық жағдайды жасаймыз»,-дейді федерация президенті Кеңес Рақышев.

Авторлары: Жандос Айтбайұлы, Кенже Амраев

Хабар 24 телеарнасы