Қызылорда облысы Нартай Бекежанов ауылындағы елі игілігіне берілген спорт нысаны мемлекет пен жеке меншік әріптестіктің жемісі, деп хабарлайды «Хабар 24».
Күрес, волейбол мен баскетбол секциясына елді мекеннің 200-дей өрені жазылып үлгерді. Одан бөлек шахмат пен тоғыз құмалаққа қызығатындар да жетіп артылады. Арнайы жабдық пен киімдер және түрлі допқа қолы жеткен ауыл балалары мәре-сәре күйге еніп, ойынның қызығына әбден батты. Жалпы соңғы жылдары Шиелі ауданында спорт кешендерін көптеп салуға ерекше мән беріліп келеді.
Ғабит Тажбанов, №9 олимпиадалық резервтің мамандандырылған балалар мен жасөспірімдер мектебінің директоры:
–25 ауыл болса, соның 15-інде бар. Бұрынғыға қарағанда, қазір Алғабас, Еңбекші, Жөлек, Бестам, Төңкерісте, Нартайда, Ақмая елді мекендерінде спорт нысаны бар. Сондай-ақ Байсын ауылдық округінде мәдениет үйінің 1 кең залын алып отырмыз.