USD 446.33
EUR 485.56
RUB 5.04
34 спортшының Бейжің олимпиадасынан жүлдесіз оралғанына жаттықтырушылар кінәлі. Мәдениет және спорт министрінің айтуынша бірнеше бапкер қызметінен босатылатын болды, деп хабарлайды «Хабар 24» Tengrinews.kz-ке сілтеме жасап.
Дәурен Абаев Щучьедегі Олимпиада спортшыларын даярлау орталығында өткен қорытынды жиында дүбірлі додаға қатысқан 34 спортшының құр алақан қайтуына 10 жылдап еңбек еткен жаттықтырушылар жауап беруге тиіс екенін айтты. Қазір шаңғы, фристайл-акробатика, трамплиннен секіру және биатлон бойынша жаттықтырушылар жауапқа алынып жатыр.
«Ең басты бапкер нәтижеге жауап береді. Дұрыс қой. Ондай нәтиже болмаса, екі-үш жылдан асып кетті. Көп бапкер 10 жылдан бері нәтиже көрсетпей келе жатыр. Кетуі заңды нәрсе. Орнына жаңа адамдар келіп, олар спортты жаңа деңгейге көтереді деп сенеміз. Мен айтып отырған 5-6 бапкер жұмыстан кететін шығар деп ойлаймын», – деді ҚР Мәдениет және спорт министрі Дәурен Абаев.
Абаев отандық спортта жүйелі проблемалар көп екенін мойындады. Бұл мәселеде 5-6 бапкерді жұмыстан шығарып, жаңа бапкерлерді алумен ғана шектелуді жоспарлап отырған жоқ.
«Жалпы елімізде қысқы спорт түрлері бұқаралық дамыды деп айта алмаймыз. Фристайл могул, фристайл акробатика деген спорт 1-2 өңірде ғана дамыған. Жасөспірімдермен біздің жаттықтырушылар айналысқысы келмейді. Қазір сараптама жасап көрсеңіз, көбі зейнеттегі немесе зейнет жасына жақындаған жаттықтырушылар. Жастар келгісі келмейді. Өйткені жалақысы өте төмен», деді ҚР ҰОК спорт дирекциясының директоры Елсияр Қанағатов.
