Теннис: Е.Рыбакина Индиан-Уэллс турнирінің үшінші айналымына шықты

Қазақстанның бірінші, әлемнің 20-ракеткасы Елена Рыбакина Индиан-Уэллс WTA 1000 турнирінде қарсыласынан басым түсті.

Жарыстың 17-ракеткасы болып тіркелген қазақстандық теннисші доданы екінші айналымнан бастап, дүниежүзілік рейтингте 58-орында тұрған бельгиялық Элисон Ван Эйтванкпен кездесті. Е.Рыбакина сағат жарымға жуық уақытқа созылған матчта қарсыласынан 6:1, 7:5 есебімен басым түсті. Қазақстандық теннисші 3 эйс жасап, 8 брейк-пойнттың үшеуін пайдаланды. Е.Рыбакина үшінші айналымда әлемнің 17-ракеткасы, осы турнирдің өткен жылғы финалисі, Беларусь өкілі Виктория Азаренко немесе рейтингте 96-орындағы австралиялық Астра Шарманың біреуімен шеберлік байқасады. Тағы бір қазақстандық, әлемнің 47-ракеткасы Юлия Путинцева екінші айналымда тартысты бәсекеде рейтингте 51-орындағы швейцариялық Виктория Голубичтен ұтылып қалды – 3:6, 6:2, 4:6.

Айта кетейік, жарыстың жүлде қоры – 8,4 млн АҚШ доллары.