Жібек Құламбаева Үндістандағы турнирда ширек финалға шықты
Жібек Құламбаева ширек финалға шықты, деп хабарлайды 24kz.
Қазақстандық теннисші Үндістанның Солапур қаласында өтіп жатқан турнирдің 1/8 финалында ресейлік спортшымен кездесті. Жерлесіміз матчты 6:4, 7:5 жалпы есеппен өз пайдасына аяқтады. Енді Жібек латвиялық Диана Марцинкевичпен кездеседі. Ал Әмір Омарханов және Заңғар Нұрланұлы Аустралия турнирінде өнер көрсетеді. Заңғар үшін бұл мансабындағы осындай деңгейдегі алғашқы турнир болмақ. Ал Әмір өткен жылы Australian Open турнирінің ширек финалына дейін жеткен.
Нұрғиса Әділетұлы ауыр атлетикадан әлем чемпионы атанды
Нұрғиса Әділетұлы әлем чемпионы атанды. Ауыр атлетикадан Бахрейннің Манама қаласында өтіп жатқан біріншілікте жерлесіміз 96 келі салмақта сынға түсті. Қоссайыстың қорытындысымен ол 388 келіні бағындырды. Нәтижесінде жеңіс тұғырына көтерілді. Одан 1 келі аз көтерген грузиялық Реваз Давитадзе екінші орынға табан тіреді. Ал үздік үштікті ирандық Али Алипур түйіндеді.
Айта кетейік, бұдан бұрын ел құрамасынан Алексей Чуркин күміс жүлдегер атанған. Ал байрақты бәсекеде ел намысын қорғауға 15 атлет атанған болатын.
Нұрғиса Әділетұлы, әлем чемпионы:
- 2014 жылы Жасұлан Қыдырбаев Алматыдағы әлем чемпионатында алтын алған еді. Араға 10 жыл салып мен сол жетістікті қайталадым. Отбасыма, қазақ еліне, мен үшін дұғада болғандардың барлығына алғыс білдіремін. Азия чемпионатынан кейін 2 жылға жуық демалдым. Әлем біріншілігіне үш ай қалғанда дайындықты бастадым. Еңбегім ақталды.
Бокс: Абылайхан Жүсіпов – Азия чемпионы
Абылайхан Жүсіпов азия чемпионы атанды. Қазақстан бокс федерациясы 11 желтоқсан күні өткен финал бойынша IBA және ASBC ұйымдарына наразылық хат жолдады. Ресми хабарламада Абылайхан Жүсіпов пен Хавасбек Асадуллаев жекпе жегінде өзбекстандық боксшы тарапынан спорттық ереже өрескел түрде бұзылғаны айтылады. Шаршы алаңдағы төреші Джована Угренович бұл сәтте ешқандай ескерту жасамағаны да сөз етіледі. Ал, Қазақстан тарапында ереже бұзылуына дәлел ретінде фото және видео материалдар да бар. Нәтижесінде ұйымдар осы салмақтағы ақтық сынды қайта қарады. 71 келіде Жүсіпов Азия чемпионы деп танылды, ал өзбекстандық боксшы белгілі мерзімге жарыстардан шеттетіледі.
Конференция лигасы: «астана» «Челсиден» жеңіліп қалды
«Астана» «Челсиден» жеңіліп қалды. УЕФА Конференция лигасы жалпы кезеңінің бесінші турында қазақстандық команда Алматыда Англияның «Челсиін» қабылдады. Қонақтар бұл ойынға негізінен жастар құрамын алып келді. Соған қарамастан лондондық футболшылар алғашқы минуттан елордалық команда қақпасы маңында жиі бой көрсетті. Небәрі он тоғыз жастағы шабуылшы Марк Гиу қазақстандық команданың қорғаныс шебін біраз әуреге салды. Ойынның 14-минутында оң қанаттан елордалық футболшыларды алдап өтіп, Мұхаммеджан Сейсен қорғаған қақпадан саңылау тауып кетті.«Челси» командасы бұл голдан кейін де басылған жоқ. Шабуылды үдете түсті. Сондай сәттердің бірінде Марк Гиу 19-минутта тағы бір мәрте мергендігімен көзге түсті. Ал Ренату Вейга 40-минутта «Челсидің» басымдығын арттыра түссе, оған «Астананың» жартылай қорғаушысы Марин Томасов 45-минутта бір голмен жауап қайырды. Жалпы есеп 3 те 1. Енді елордалық клуб 19 желтоқсанда сырт алаңда Кипрдің АПОЭЛ командасымен шеберлік байқасады.
Қазақстан хоккейшілері әлем чемпионаты алдында екі жолдастық кездесу өткізеді
26 желтоқсан мен 5 қаңтар аралығында Канадада жастар арасындағы шайбалы хоккейден әлем чемпионаты өтеді. Ел құрамасы В тобында Чехия, Словакия, Швейцария және Швеция командаларымен кездеседі. Жерлестеріміз әлем чемпионаты алдында екі жолдастық кездесу өткізеді. 19 желтоқсанда Германия құрамасына қарсы ойнаса, ал 21 желтоқсанда Орталық Канада хоккей лигасында өнер көрсететін «Хоксбери Хокс» жастар командасымен мұз айдынына шығады. 27 желтоқсанда Қазақстан құрамасы чемпионатты бастайды. Алғашқы матч шведтерге қарсы болмақ.