Бұл ретте елордада қолайлы бағада пәтерлер мен хостел нөмірлерін алуға бұрынғыша мүмкіндік мол, деп хабарлайды Астана әкімдігінің медиа орталығы. «Астана Конвенш Бюро» ЖШС директорының орынбасары Асқар Адамбековтың айтуынша, меймандар тарапынан бес немесе төрт жұлдызды қонақүйлерге сұраныс жоғары, ал арзанырақ бағадағы қонақүй, хостел, жатақханаларда орын көп. «Көрменің алғашқы күндері қонақүй желілері 100% толды. Бес немесе төрт жұлдызды қонақүйлерде тіпті бос орын қалмады. Ал басқа нөмірлерде, айталық, үш жұлдызды қонақүйлерде орын жеткілікті» - деді А.Адамбеков. Сонымен қатар, қазақстандық тұрғын үй орындарындағы (қонақүйлер) баға шетелдіктер үшін ғана емес, елдің әр өңірінен келетін қонақтарға да қолжетімді деп санайды елорда әкімдігі. Бағаның тез құбылуына жол бермеу мақсатында қала билігі жалға берушілердің арнайы қауымдастығын құрды. Ресми мәліметтерге сүйенсек, ЕХРО-ның алғашқы күндері елордаға 10 мыңнан астам қонақ келген. Әлемдік жұлдыздардың концерті өтетін күндері мен ірі шаралар кезінде туристер жан-жақтан ағылады деп күтілуде.