Ақтауда заманауи лицей жұмысын бастады
Ақтауда заманауи үлгідегі білім ұясы өз жұмысын бастады.
«Gasyr» лицейі жаңа оқу жылында 600 баланы 6-11 сыныптарға қабылдауға әзір. Оқу орны физика-математика, химия, биология пәндерін тереңдетіп оқытады. Дәріс қазақ, орыс және ағылшын тілінде өткізіледі. Сондай-ақ оқушы өз қалауынша түрік, неміс, итальян тілдерін де үйрене алады. Лицейде арнайы шақыртумен келген білікті ұстаздар сабақ береді. Айта кетсек, “Gasyr” лицейінің бірнеше қалада филиалы бар. Оқу орнының құрылтайшысы Якуб Халықбердиев.
Ұлжан Аралбай перзентінің енді «Gasyr» лицейінде оқитынына қуанышты. Арина есімді қызы биыл 11-сыныпқа барады. Анасының айтуынша, баласы оқуда озат. Қазақстан тарихы пәнінен өңірлік білім сайысына қатысып, жеңімпаз атанған. Келер жылы лицейді үздік бағамен аяқтап, әлемнің үздік университетінің біріне түсеріне үмітті.
Ұлжан Аралбай, қала тұрғыны:
- Бірнеше елді қарастырып жатырмыз. Италия, Араб әмірліктеріне немесе Катар. Осы «Gasyr» лицейі біз үшін өте қуанышты жаңалық. Нағыз тілді үйрету, шетелге дайындауда осы мектеп барлық жағдайды келістіріп жасайды деп ойлаймын.
«Gasyr» лицейінің бағдарламасы оқушының ойлау әрі шығармашылық қабілетін жан-жақты дамытуды көздейді. Сабақ «Отыр да тыңда» форматынан мүлдем бөлек, шетелдік тәжірибеге сүйене отырып өткізіледі. Тереңдетілген дәрістен бос уақытта әр жеткіншек өз таңдауына қарай қосымша сабақ немесе спорт үйірмесіне қатысады. Оқытушылар құрамы үздік педагогтардан жасақталған.
Әсет Мұртазин, Gasyr лицейінің директоры:
- «Gasyr» лицейінде шетелден арнайы шақыртылған ұстаздарымыз бар. Олар тереңдетілген пәндерді ағылшын тілінде өткізеді. Жалпы ұжымда Астана, Алматы басқа да өңірлерден келген 45 білікті педагог бар. Түлектеріміздің отандық және әлемнің үздік оқу орындарына түсуіне көмектесуге дайынбыз.
Gasyr Foundation School осымен бесінші оқу орнын Ақтау қаласында іске қосты. Қалғандары Астана, Алматы қаласында өз қызметін жалғастыруда. Келешек Жаңаөзен және Мұнайлы ауданында ашу жоспарланған. Айта кетсек, түлектері IELTS көрсеткіштері бойынша орта есеппен 7,5 балл, ал SAT сияқты танымал тест түрінен 1450 балл жинаған.
Талғат Исламұлы, Ренат Досалиев