Қазақстан авиациялық қауіпсіздік бойынша 95 пайыздық көрсеткішпен, үздік 20 елдің қатарына енді.
Бұл туралы Үкімет басшысының ИКАО Бас хатшысы Хуан Карлос Салазармен өткен кездесуінде мәлім болды. Басқосуда Қазақстанның ИКАО-мен ынтымақтастығын одан әрі нығайту мәселелері талқыланып, экономиканы дамытуға бағытталған ауқымды реформалар назарға алынды. Премьер-министр президенттің Қазақстанның көлік-логистикалық әлеуетін дамытуға, авиациялық хабтар қалыптастыруға және елдің транзиттік ролін нығайтуға ерекше мән бергенін атап өтті. Тиісінше ИКАО-мен өзара іс-қимыл Қазақстанның авиация саласы үшін стратегиялық маңызға ие. Хуан Карлос Салазар еліміздің авиациялық қауіпсіздікті қамтамасыз етудегі жетістіктерін жоғары бағалап, әуежай және аэро-навигациялық инфрақұрылымды дамыту және нығайту бойынша маңызды қадамдардың жасалғанын жеткізді. Сондай-ақ отандық әуе-компаниялары әуе флотын жаңғыртып, халықаралық маршруттық желіні кеңейтіп жатқанын да түртіп өтті. Айта кеткен жөн, соңғы бес жылда елімізде авиация саласының жалпы қызметі 6 жарым есе өсіп, 3 миллиард долларға жуықтады. Ал жолаушылар ағыны 31 миллион адамнан асып, халықаралық маршруттық желілер 160-тан астам бағытқа дейін артты.
Тегтер #Қазақстан #Авиациялық қауіпсіздік #ИКАО #24KZPhone: +7 (7172) 757 485
E-Mail: 24kz@khabar.kz