Әлемдік нарықта алтын қымбаттады

Бұл қымбатшылық геосаясаттағы ахуалға байланысты болып отыр. Нью-Йорктегі Комекс тауар биржасында құнды металлдың унциясы 0,75 процентке көтеріліп, мың 953 долларға саудаланды, деп хабарлайды «Хабар 24».

Жалпы алтын жыл басынан бері біртіндеп қымбаттап келеді. Ақпанның бірі мен 23-і аралығында бағасы күн сайын 0,4 процентке көтеріліп отырды. Елдің ұлттық банкінің мәліметі бойынша ақпан айында 1 грамм алтын 28 мың 700 теңге деп белгіленді. Бұл қаңтармен салыстырғанда 15 процентке жоғары. Сарапшылар алтынның қымбаттауы қалыпты жағдай деп санайды. Өйткені  байлықты сақтаудың ең сенімді түрі осы құнды металл болғандықтан, дағдарыс кезінде азаматтардың көбі қаржысын алтынға айырбастап қояды. Әсіресе карантин кезінде сұраныс артып, құны 2 мың доллардан асқан еді. Биыл қаңтарда ел тұрғындары мың 800 алтын құймасын сатып алды. Өткен жылдың сәйкес кезеңімен салыстырғанда 26 процентке аз. Жыл басынан бері тұрғындарға жалпы салмағы 2 тонна 800 келі болатын 76 мың 700 алтын құймасы сатылды. Айта кетейік, Қазақстанның халықаралық қорының үштен екісі алтынмен сақталған.

IPO ҰЛТТЫҚ ҚОРДЫ 500 МИЛЛИАРД ТЕҢГЕГЕ ТОЛЫҚТЫРАДЫ

«Самұрық-Қазынаға» қарасты компанияларды IPO-ға шығару арқылы ұлттық қорды 500 миллиард теңгеге толықтыруға болады. Бұл туралы акционерлік қоғамның басқарма төрағасы Алмасадам Сәтқалиев мәлімдеді. Оның айтуынша, «ҚазМұнайГаз», «Эйр Астана», «KEGOC», «QazaqGaz» компаниялары IPO-ға шығады. Бағдарлама бойынша 8 миллиард АҚШ долларынан астам сапалы инвестиция тарту жоспарланған. Оның 4 триллион теңгесіне жаңадан 24 өндіріс орны құрылып, 5 мың жаңа жұмыс орын ашылмақ. Бұған мемлекет басшысы «Самұрық -Қазынаны» сынға алып, оған реформа жүргізуді тапсырған еді. Осыған байланысты сатып алу үдерісін ашық жүргізу, оған қатысушыларға кедергілерді азайту, басқару жүйесін оңтайландыру бойынша жұмыс жүргізіліп жатыр. Соның аясында электр қуатын жеткізуге қатысатын 44 делдал компаниямен келісім шарт тоқтатылмақ. Қабылданған шаралардан кейін биылдың өзінде 2 миллиард теңге үнемделеді.

ӘЛЕМ ЭКОНОМИКАСЫ $1 ТРЛН КЕМИДІ

Келер жылы әлем экономикасы 1 процентке қысқарады. Яғни сауда айналым 1 триллион долларға азаяды. Мұндай болжамды Британияның әлеуметтік экономикалық зерттеу институты жариялады. Сарапшылардың пайымынша, Ресей мен Украина арасындағы қақтығыс салдарынан әлемдік инфляция 2 процентке жоғарылауы ықтимал. Қос мемлекет те титан, палладий бидай және жүгеріні негізгі жеткізушілердің бірі саналады. Енді бұл өнімдердің кешігуі кейбір тауарлардың өндірісін тұралатып тастауы мүмкін. Оның үстіне Ресейге салынған санкциялар әлемдік нарықта кейбір шикізат түрлерінің қымбаттауына әкеледі. Шектеулер Ресей экономикасын да шатқаяқтатып тастайды. Британиялық сарапшылардың есебі бойынша биылдың өзінде көрші елдегі ішкі жалпы өнім 1,5 процентке, 2023 жылы 2 процентке дейін кемиді. Ал инфляция биылдың өзінде 20 процентке жетеді деген болжам бар.