Қазақстанда автонесие беру көлемі айтарлықтай қысқарды. Банктер қарыз алушыларды іріктеу талаптарын күшейтіп, несие алушыларға қойылатын талаптарды қатаңдата бастады, деп хабарлайды «24KZ».
Қаржы нарығын реттеу және дамыту агенттігінің мәліметінше, 2026 жылдың сәуірінде берілген автонесиелер көлемі өткен жылдың сәйкес кезеңімен салыстырғанда 26,6 пайызға азайған. Мамандар мұны банктердің қарыз алушыларға қойылатын талаптарды күшейтуімен байланыстырады. Қаржы ұйымдары тәуекелі жоғары клиенттерді мұқият іріктеп, төлем қабілетін бағалау жүйесін қайта қараған.
Агенттік дерегіне сәйкес, бұл шаралар проблемалық несиелердің үлесін азайтып, несие портфелінің сапасын жақсартуға бағытталған.
Жалпы алғанда,
Сәуір айында қазақстандықтарға 1,57 трлн теңге көлемінде жаңа несие берілген.
Бұл өткен жылдың осы кезеңімен салыстырғанда 5,4 пайызға төмен көрсеткіш.
Ал кепілсіз тұтынушылық несиелер сегментінде төмендеу 4,3 пайызды құрады.
Сарапшылардың пікірінше, автонесиеге сұраныстың азаюына көлік бағасының тұрақтануы мен арзандауы да әсер еткен. Соның салдарынан автонесиеге берілген өтінімдер саны өткен тоқсанмен салыстырғанда 20 пайызға қысқарған.
Айта кетейік, қазіргі таңда Қазақстанда автонесиелер жылдық 0,1 пайыздан 35 пайызға дейінгі мөлшерлемемен рәсімделеді. Сонымен қатар отандық өндірістегі көліктерге арналған жеңілдетілген автонесие бағдарламасы жұмыс істеп тұр. Бұл бағдарлама бойынша сыйақы мөлшерлемесі шамамен 4 пайызды құрайды.