Ақмола облысындағы «Ақкөл Құс» құс фабрикасының жылдық өндірістік қуатын 90 млн-нан 200 млн жұмыртқаға дейін арттыру жоспарланып отыр. Жобаны іске асыру үшін жаңа өндірістік корпустар салынып, кәсіпорынның инфрақұрылымы жаңғыртылады, деп хабарлайды 24KZ.
Бұл туралы өңірге жұмыс сапарымен барған Ауыл шаруашылығы вице-министрі Аманғали Бердалиннің құс фабрикасының жұмысымен танысуы барысында мәлім болды.
«Ақкөл Құс» фабрикасы 2014 жылдан бері жұмыс істейді. Кәсіпорын негізінен тағамдық жұмыртқа өндіруге маманданған. Қазір мұнда жұмыртқалайтын тауықтарға арналған алты корпус, жас құстарды өсіретін екі корпус, жеке жем цехы және жұмыртқаны сұрыптауға арналған жабдықтары бар қойма жұмыс істейді. Құс саны 300 мың бастан асады. Жыл басынан бері фабрикада 48 млн жұмыртқа өндірілген.
Кәсіпорын өнімдері Ақмола және Түркістан облыстарына, Астана мен Көкшетау қалаларына, сондай-ақ Қырғызстанға жеткізіледі. Соңғы екі жылда фабрикада құстарды ұстау және өсіруге арналған жабдықтар жаңартылған.
Өндіріс қуаты қалай артады?
Жоба аясында жалпы сыйымдылығы 324 мың басқа арналған жұмыртқалайтын тауықтарға арналған төрт заманауи корпус салу көзделген. Бұл жылына қосымша 110 млн жұмыртқа өндіруге мүмкіндік беріп, фабриканың жалпы өндірістік қуатын 200 млн данаға дейін жеткізеді.
Сонымен қатар жас құстарды өсіретін ғимараттар салу, сағатына 30 мың жұмыртқа сұрыптайтын желісі бар қойма тұрғызу және жем цехының қуатын кеңейту жоспарланған. Инфрақұрылымды жаңарту өндірістік үдерістердің тиімділігін арттырып, өнімнің өзіндік құнын төмендетуге мүмкіндік береді.
Қазіргі уақытта жобаның жобалау-сметалық құжаттамасы әзірленіп, мемлекеттік сараптаманың оң қорытындысы алынған. Құрылыс жұмыстарын 2026 жылғы қарашада бастау жоспарланып отыр. Қытай мен Еуропадан қажетті жабдықтарды жеткізу және монтаждау жұмыстары келесі жылға белгіленген.
Жобаның бірінші кезеңін 2027 жылғы сәуірде аяқтау көзделсе, кәсіпорын толық өндірістік қуатына 2028 жылдың ортасында шығуы тиіс.
Өңірде жұмыртқа өндірісі артады
Құс фабрикаларын жаңғырту және жаңа инвестициялық жобаларды іске асыру нәтижесінде 2028 жылға қарай Ақмола облысында тағамдық жұмыртқа өндірісін жылына 1 млрд данаға дейін жеткізу жоспарланып отыр.
Қазір өңір Қазақстанның тағамдық жұмыртқаға деген қажеттілігінің 15%-ын қамтамасыз етеді. Сонымен қатар елде өндірілетін құс етінің 30%-ы Ақмола облысының үлесіне тиесілі.
Өндіріс көлемін арттыру отандық ауыл шаруашылығы өнімдерінің үлесін ұлғайтуға және елдің азық-түлік қауіпсіздігін нығайтуға бағытталған.
