Көкшетауда этномәдени бірлестіктердің жұмысы таныстырылды

Ақмола облысына жұмыс сапарымен барған Қазақстан халқы Ассамблеясы төрағасының орынбасары Марат Әзілханов этносаралық келісімді нығайтуға арналған бірқатар шараларға қатысты, деп хабарлайды 24kz.

Көкшетаудағы Достық үйінде ол сәндік-қолданбалы өнер шеберлерінің көрмесін тамашалап, облыстық этномәдени бірлестіктердің жұмысымен танысты. Ал Ассамблея активімен өткен кездесуде Мемлекет басшысы жүктеген тапсырмаларды орындау, ҚХА-ның 30 жылдығына дайындық және әлеуметтік-мәдени жобаларды жүзеге асыру мәселелері талқыланды. Сонымен қатар этномедиацияны жетілдіру және ақпараттық жұмысты күшейту жайы қозғалды.

Гүлбара Нұрқанова, ҚХА жанындағы Сәндік-қолданбалы өнер шеберлері одағының төрағасы:

- Көкшетаудағы Достық үйінің ішінде әр этнос өкілдерінің өздерінің жеке кабинеттері бар. Ол жерде ұлттық бұйымдары, күнделікті қолданатын немесе бұрынғы ата-бабаларынан қалған ескерткіш ретіндегі бұйымдарын өздерінде сақтап, келешек жастарға үйретеді. Тек қана өздерінің емес, осында келетін қонақтарға көрсетуге жағдай жасалған.